No.2891/2021-2022

Aizawl, the 5th November 2021 : Vawiin chawhnu khan Lunglei HPC Vice Chairman Pu Lawmawma Tochhawnga hovin HPC Lunglei Conference Hall-ah Lungleia RT-PCR Laboratory ruahman mek chungchang sawihovin NGO hrang hrangte nen meeting neih a ni.

Meeting-ah hian Lunglei South bialtu MLA Dr K Pachhunga, NHM Mission Director Dr Eric Zomawia, Lunglei CMO Dr LC Liana, Medical Superintendent Dr SR Ngurchamliana leh medical thawktu dangte bakah Chhimbial Chhantu, Sub Hqrs YMA Lunglei, MSU hruaitute bakah MJA Lunglei te an tel a ni.

HPC Vice Chairman Pu Lawmawma Tochhawng chuan Tourist Lodge building-a RT-PCR Laboratory ruahman mek leh Covid-19 do kawnga sawrkar hmalakna hrang hrang leh hmachhawpte sawiho tura meeting koh anih thu a sawi.

NHM Mission Director Dr Eric Zomawia chuan sawrkar laipui ‘India COVID-19 Emergency Response & Health System Preparedness Package: Phase-II (ECRP-II package)’ kaltlangin Lunglei RT-PCR Laboratory mamawh bungrua leh thil hrang hrang leina atan cheng nuai 30 dawn anih thu sawiin bungrua mamawhte hi Government e Marketplace (GeM) Portal hmanga online bidding kaltlanga lei an nih tur thu a sawiin hmalakna a kal mek tawh thu kalkhawmte a hrilh. RT-PCR Laboratory a duty tur staff te pawh ZMC ah training thuai tura ruahmanna siam a nih tawh thu a sawi bawk.

Covid-19 second wave ah naupang Covid kai an tam thu leh naupangah Covid avanga natna khirh tak Multisystem inflammatory syndrome in children (MIS-C) te thleng thei anih avangin Covid-19 natna laka naupang venhim chu sawrkarin a ngaih pawimawh takzet thu leh Lunglei Civil Hospital-ah naupang damlo na te enkawlna bik Pediatric ICU ruahman mek a nih thu NHM Mission Director chuan kalkhawmte a hrilh bawk.

Lunglei Medical Superintendent Dr SR Ngurchamliana chuan Tourist Lodge building-a RT-PCR laboratory bun turin September ni 20 ah hna thawk tanin civil works hi October thla tawpa zawhfel anih thu a report a. November ni 3 khan Planning & Programme Implementation Department official-ten an rawn enfiah thu a sawi bawk. Lunglei DCHC, tun dinhmuna SIRD Pukpuia awm mek chu Lunglei Civil Hospital building chhunga sawn thuai tura inpuahchahna a kal mek thu leh ICU khum 12 ruahman mek niin thawktute ZMC ah an training mek thu a report a ni.

Zawhna leh chhanna hun hman chhunzawm nghal niin Joint NGO Coordination Committee Chairman Pu Lalrotluanga, President Sub Hqrs YMA Lunglei chuan RT-PCR Laboratory chu Lunglei District leh chhimlam district dang mipuiten kan mamawh tawh takzet a ni tiin MLA-te leh Health Department hotute chu a rang thei ang bera hmabak te bawhzui nghal tur leh thawktute training pawh ruahman vat turin a ngen a ni.

Joint NGO Coordination Committee member-te zawhna chhangin HPC Vice Chairman Pu Lawmawma Tochhawng chuan Thorang AC bialtu MLA Pu Zodintluanga’n RT-PCR khawl a rawn donate chu makeshift laboratory siam mekah hian hman anih tur thu a sawi.