No.2892/2021-2022

Aizawl the 5th November, 2021 : Azadi Ka Amrit Mahotsav hmalakna kal zelah vawiin chawhnu khan SP, Conference Hall, Lunglei ah District Legal Services Authority, Lunglei District leh Superintendent of Police, Lunglei te buatsaihin Legal Awareness Campaign hun hman ani. Eradication of Drug Menace tih thupui hmangin zirhona neih ani.

Pu F.C. Zonghinga, Prosecuting Inspector, District Court, Lunglei chuan inkhawm kaihruaiin Pu C. Lalfakmawia, Addl. Superintendent of Police Lunglei chuan khuhhawnna neiin Legal Services Authority hi kum 1987 ah din ani a. Mizoram District pariat (District thar tel lovin) ah District Legal Services Authority hi a awm a, District Legal Services Authority hian Mizoram hmun hrang hrangah Legal Awareness Campaign neiin dan lam mithiam te nen thawkhovin dan leh hrai mipui leh pawl te hnenah zirtirna an pe thin a ni. Kan dikna leh chanvo te rahbeh kan awm loh nan dan lam hriatna tihpun a ngai a ni a ti. Lok Adalat (Mipui te Court) hi awlsam zawk leh sum sen tlem zawka thubuai neite insiamremna ani a ber a. Drugs hian kan khawtlang leh inchhungkhurah min ti buai hle a, chuvangin Drugs hi kan do a tihrem a ngaih thu sawi in Lunglei District ah Kum 2019-2021 chhungin ND&PS Act Case 10 awmin, mi 12 man an ni a ti.

Pu F. Rohlupuia, MJS, Judge Special Court, ND&PS Act, Lunglei Judicial District chuan Eradication of Drugs Menace (ND&PS Act) Drugs kan umbo theihna leh ND&PS Act chungchang zirtirna a pe a ni . Drugs in thalai nun a khawih pawi dan te, Hriselna a khawih pawi thei dan te, thihna a thlen dan te, Mipa an thih tam avangin pasal tlak an tlem phah dan te, chhungkua leh khawtlang a him lo dan te leh Drugs hralhna atanga sum diklo lakluh anih avangin thil man a to phah dan te a sawi a ni. ND&PS Act chungchang zirtirna a pe bawk.

Vawiin chawhma khan District Legal Services Authority, Lunglei leh Excise & Narcotics Department ten Legal Awareness Campaign hun Excise & Narcotics Conference Hall, Lunglei ah hmanna an nei bawk.