No.2893/2021-2022

Aizawl, the 5th November, 2021: Vawiin khan Serchhipah Pu Lalruatkima, Hon’ble Minister, Rural Development, I&PR etc chuan SEDP sum Rs. 3,72,82,000 (nuai zathum sawmsarih pahnih leh sangriat zahnih) senga sak chhungkaw 12 luah theih tura ruahman RD Staff quarters building panga a hawng a. Rural Development Serchhip Block in Kum 60 a tlinna (Diamond Jubillee) hriatrengna lungphun (Monument) hawngin BNRGSK Hall ah Serchhip RD Block Kum 60 tlin lawmna Programme ah khuallian a ni.

Minister chuan, kum 60 tlin hi thil awlsam a ni lova, thlen vek kan duh mahila thleng zo ta lo mi tam tak an awm a ni. Vawiinah Serchhip RD Block in kum 60 a tling thei hiPathian venna avang a ni a, lawmthu sawi tur tam tak kan nei a ni, a ti. RD Department hi Department pawimawh tak pakhat niin thingtlang miten lei rem an rah theih nana hmalatu a ni a. Central sawrkar pawhin a ngaipawimawh hle. Kan ramah mihring awm zahve aia tam mah thingtlangah kan awm a, chung mite khai chhuaktu atana thawktu pawimawh tak chu a ni. Vawiina RD hmalakna kal mek pakhat thingtlang mite tan kum khata Ni 100 inhlawhna siam hi ni za tlina harsa em em thin a, chutih lai chuan tun hnai kum 2 chhungin kan district ah ni 100 inhlawhna siam a ni tawh a, kuminah pawh covid-19 hri leng karah ni 100 inhlawh thei turin hma lak mek a ni, tiin MGNREGA Serchhip district hmalakna tlangpui a tarlang bawk.

Pu Lalruatkima chuan, Jubillee chuan hnathawh tlo zawk leh mawi zawk hringchhuak se, kum kalta aia hnathawh tha zawk rah chhuah nei se a duh tih sawiin thingtlang kilkhawr ber ber a miten zirna tha, hriselna tha an neih theih nan tan kan lak zel a ngai a ni, a ti.

He hunah hian Pi Remsangpuii, Techincal Assistant, Serchhip RD Block chuan Technical Report a pe a, Building tin len zawng hi a dung 42 ft leh a vang 30 ft niin, a chhawng veka sak an ni a. A vai hian chhungkaw sawmpahnih (12) luah theih tura sak niin Building zawng zawng hi a chung Steel Structure leh Dyna Roof leh PVC Ceiling vuah vek an ni a. A tukverh hi Aluminium niin a chhuatah Floor Tile phah vek an nih bakah, Quarters kaw tinah hian Kitchen Cabinet dah vek a ni bawk.

Pu R. Zarzosanga, Secretary, RD Department pawhin thu sawiin, RD Department hnuaia scheme tam tak thawh thinah nasa taka hma la a, taka chantirtu chu BDO Office te an ni thin a, an pawimawh em em a ni, a ti a. BDO Office Serchhip pawh ram pumah a thawk tha pawl tak an nih thu a sawiin, thingtlang zawka chengten a zar an zo zel theih nana thawk sauh sauh zel turin thawktute a chah nghal a ni.

He hun hi Pi Lalrinchhani Ralte, BDO Serchhip chuan a kaihruai a, Pi Irene Zohlimpuii Chongthu, Joint Secretary, RD Department, Pu Malsawmtluanga, PD, DRDA Serchhip leh Pu Lalmuansanga Ralte, Addl. DC Serchhip ten thu an sawi a. Pu C Lalhmangaihzuala, Vice Chairman, Staff Welfare Committee, BDO Office in lawmthu sawiin a lawmna inkhawm a khar a, tlaiah Kum 60 (Diamond Jubillee) lawmna ruai kilho nghal a ni.