India ram pum huap khawpui fai inelna Swachh Survekshan 2018 hnuaia Lunglei khawpui fai taka cheibawl a nih theih dan tur ngaihtuahin vawiin khan Pu S.Laldingliana HPC Vice Chairman hovin a Office Chamber ah Media mi te leh DUDO Lunglei te an thukhawm.

Meeting kaihruaitu HPC Lunglei Vice Chairman Pu S.Laldingliana chuan Sawrkarin kan mamawh tam tak min tihsak te kan ta anga enna chang kan hre tlat lo thin hi kan inbih chian a ngai a ni tiin, faina kawngah phei chuan nasa zawka inzirtir kan la ngai hle a ni a ti. Swachh Survekshan 2018 hnuaiah India rama khawpui thahnem tak te faina kawngah kan inel dawn a, Mizoram bikah pawh he inelna a tel tur hian Census Town 23 thlan kan ni a, Lunglei khawpui chu India ram huapa a tha ber kan ni theilo a nih pawhin Mizoram bikah chuan khawpui fai ber kan ni thei a ni tiin, chutiang ni thei tur chuan kan zavaia kan tanho a ngaia, hemi kawngah hian Media ten pawimawhna leh mawhphurhna sang tak an nei a ni tiin, mipuite hrilh hre tu leh zirtirtu pawimawh an ni a ti. Mizoram chhung District khawpui faina kawnga inelna ah Lunglei in pahnihna kan lak theih chuan nasa zawkin mitin ten tan la ila India ram pum huap inelna ah pawh a titha ber zing ami kan ni thei a ni tiin, Department lam pawhin nasa taka ruahmanna an siam mek thu a sawi bawk.

Pu Andrew Lalhruaia DUDO Lunglei pawhin thu sawiin,  Swachh Survekshan 2018 hnuaiah India rama khawpui Statutory Town 4041 faina kawngah inel tur a nih thu a sawi a, he inelna ah hian zawhna chi hrang hrang chhan tur 500 chuang awmin kan chhanna angin Central atangin a endiktu tur an lo kal dawn a ni tiin, he Programme hi mitin in kan hriat chian a ngai a, chumi kawnga mipute hrilhre thei bertu chu Chanchinbumi te an ni tiin theihtawpa thawhpui turin a sawm bawk. Pu Andrew Lalhruaia chuan Lunglei khawpui chhung cheimawina tur leh Faina kawnga hmalakna tur pawimawh zual ruahmanna an siam te tarlangin heng ruahmanna an siam te leh kalkhawm ten an ngaihpawimawh dangte Meeting ah hian sawiho nghal a ni bawk. He huna tel Media te pawhin Lunglei khawpui Faina kawnga hmalakna turah hian theihtawp chhuah an inhuam thu an sawi a ni.

 

Attachment

  • Loading attachment...