No.3244/2021-2022
Aizawl, the 2nd December, 2021: Vawiin chawhma khan Lunglei HPC Vice Chairman Pu Lawmawma Tochhawng chuan a MLA Fund atanga cheng nuai 5.50 senga lei hnim hlum pekchhuahna khawl ‘GE CARESTATION 30 ANAESTHESIA MACHINE’ chu Christian Hospital Serkawna (CHS) hman turin a hlan. CHS aiawhin Dr Lalramzauva, Director, Medical & Health Department, BCM in khawl hi a dawng a ni.

Hlanna hun tawi CHS Building-a neihah HPC Vice Chairman Pu Lawmawma Tochhawng chuan Christian Hospital Serkawn doctor leh nurse-te thawhrimna leh inpekna chu fakawm a tih thu sawiin mi harsa leh natna khirh tak tak vei te thahnemngai tak leh hmangaih taka an lo enkawl thin avangin an chungah lawmthu a sawi a. CHS ti changtlung zel tura khawl mamawh CHS hotuten a hnena an rawn thlen chu alo ngaih pawimawh takzet thu leh a bial pawn lama MLA Fund hmang tur hian sawrkarah phalna lak phawt anih thu kalkhawmte a hrilh a. Hnim hlum pekchhuahna khawl chu CHS thawktuten tangkai taka an hman tura hlanin an mamawh dangte pawh ngaihtuah chhunzawm sak zel a tum thu a sawi a ni.

Dr Lalramzauva, Director, Medical & Health Department pawhin thu sawiin Christian Hospital Serkawn-ah damlo zai tur admit zat an pun zel laiin tun dinhmunah vawi khatah mi pakhat chauh zai theih a ni a. Indaihlohna a nasat avangin operation theatre hi zauh mek niin he hmalakna ah hian Anaesthesia Machine chu hmanraw pawimawh berte zing ami a ni, a ti a. Lunglei HPC Vice Chairman-in an ngenna tih hlawhtlin sakin khawl tha tak GE company siamchhuah an dawng chu Christian Hospital Serkawn tan hmasawnna rahbi pawimawh tak a ni tiin thawktu zawng zawngte aiawhin lawmthu a sawi a ni.