No.3568/2020-2020

Mizoram chhim lam District te tana Entrepreneurship (mahni kutkawiha eizawnna) chungchang inzirtirna leh Entrepreneurship lama hmalakna hmun pui tur ‘Entrepreneurship Development Centre (EDC) for Southern Mizoram’ chu vawiin khan Lunglei HPC Vice Chairman Pu Lawmawma Tochhawng chuan HPC Office, Chanmari-ah a hawng.

He Entrepreneurship Development Centre (EDC) hi Planning and Programme Implementation Department kaltlanga ruahman niin a hawnna program ah hian Planning Department Secretary Dr C. Vanlalramsanga leh Planning Department Director Dr Lalrinchhana te an tel a. HPC member-te bakah MZP,MSU, party hruaitute leh Lunglei entrepreneur-te an tel bawk.

Lunglei HPC Vice Chairman chuan EDC for Southern Mizoram chu Mizoram mipuite, a bik takin chhim lam District - te tan hmasawnna rahbi pawimawh tak a ni tiin he Centre ti puitling tura theihtawp chhuaha hma la tu leh bultumtu Planning & Programme Implementation Department-te chungah lawmthu a sawi a. Ram hmasawn tur chuan mahni kutke ngeia eizawnna kawng dap thiam entrepreneurs-te Mizoramin a mamawh chho zel dawn a ni tiin he Centre-in a tum ber chu kan thalaiten mahni thiam zawng leh tui zawnga eizawnna kawng an dap chhuah theihna tura hmalak a ni, a ti a. Nikum kum 2019 khan Lunglei District tana entrepreneurship lama intihsiakna ‘Leitlangpui Rahbi’ hlawhtling taka kalpui anih thu sawiin HPC Vice Chairman chuan EDC chu ei leh bara kan intodelhna tura hmalakna peng pawimawh tak pakhat a ni, a ti a. Mizo thalaite zingah entrepreneurship lama tui tak tak, mahni kutkawiha dinchhuah tum, mi tum ruh leh beisei awm tam tak an awm chu lawmawm a tih thu sawiin ‘Entrepreneurship’ chu Mizoram tan hmasawnna khawlpui (Engine of Growth) a la ni ngei dawn a ni, a ti bawk.

Planning Department Secretary Dr C. Vanlalramsanga chuan Entrepreneurship chu ram hmasawnna nena kal kawp tlat a ni tiin ram changkang apiangin entrepreneurs an nei tha a, an hmasawnna an ngai pawimawh a ni, a ti a. Kan ramin hma a sawn zelna turah chuan entrepreneurship - hna thawh tur zawngtu ni lova a ruaitu zawk nih chu bung thar kan kai theihna tur a nih thu leh chumi avang chuan entrepreneurship chawikan chu sawrkar in a ngaih pawimawh thu a sawi a. Entrepreneurship Development Centre (EDC) kaltlang hian Entrepreneurship lama hmalakna leh inzirtirna hrang hrang - Lecture, Seminar, Webinar leh conference-te buatsaih chhoh tum anih thu a sawi bawk.

Vawiin program hi Pu C. Vanlalmuana, Chief Planning Officer, HPC in a kaihruai a, Rev R. Zohmingliana, BCM Chanmari Bial, Lunglei in hunserh a hmang ani.

‘Entrepreneurship Development Centre (EDC) for Southern Mizoram’ hi HPC Lunglei Officer, 1st Floor, Chanmari, Lunglei-ah a awm a. He Centre kaltlang hian Entrepreneurship lama hmalakna leh inzirtirna hrang hrang - Lecture, Seminar, Webinar leh conference-te buatsaih thin a ni dawn a ni.