No.3569/2020-2020

Dated Champhai, the 29th July, 2020: Mizoram sawrkara Power & Electricity Minister Pu R. Lalzirliana chuan Tuipuiral tlang dung East Tuipui biala lirnghing tuar khuate a fang chhunzawm zel a. Vawiin hian Vaphai, Samthang, Dungtlang, Leithum, Leisenzo, Khuangleng leh Sesih khuate a tlawh a, khawtlang aiawh hruaitute nen inkawmhona hun neiin, lirnghing tuar khaw hrang hrangte puala a bik taka ruahman Solar Street Light leh man tlawm zawkin Study Lamp te a sem bakah tanpuina pawisafai leh mamawh dangte a hlan a ni.

Khaw hrang hrang a tlawhkualnaah Power & Electricity Minister Pu R.Lalzirliana chuan mizote chu lunggaih ni a intahpuia, lawm ni a inlawmpui thin hnam, thian chhan thih ngam leh induhsaktawnna rilru thianghlim tak pu thin kan ni, a ti a. Tuipuiral tlangdung lirnghing tuar khuate rilru puthmang, mizo ze dik tak chu chhuanawm a tih thu sawiin, an hun tawn mek chu sawrkarin a hriatpui thu leh Covid-19 vanga harsatnate hrang hrang awm karah pawh theihtawp chhuahin a ngaihven reng thin thu a sawi a. Khawtlang mipui leh hruaitute chu mipui vantlang tana rawng bawl sak leh hmalakna kawngah sawrkar tawiawm tlat thin turin a chah a ni.

P&E Minister chuan hmun danga tih zen zen ngai lohin Chief Minister hmalaknain lirnghing tuar khuate tan Solar Street Light 100 Tuipuiral khaw hrang hrangahte sem mek zel anih thu sawiin, YMA chu Zofate innghahna pawl tangkai tak, rikrum thila chhuak hmasa ber thin, khawtlanga hnarkaitu pawimawh ber an nih avangin Solar Street Light bunfel turte enkawl zui leh lo buaipui kawnga phungbawmah an sawm thu a sawi a. Sem tur 100 bakah a man pek lawk tawh 71 te nen avaiin Solar Street Light 171 an rawn ken thu a sawi a. Solar Study Lamp pawisa pek lawk tawh 855 an rawn ken tel thu pawh sawiin, heng baka 945 dang an rawn kente pawh subsidy rate-in lirnghing tuarte hnena an pek mek zel thu a sawi a, indaihlohna phuhru turin Solar Street Light dang 100 ngaihtuah belh sak a tum thu a sawi a. Solar Street Light-te chu nikang leh ni dawng rei thei hmunahte bun hram hram nise tiin, ZEDA lam hotu chu a enkawl leh rawn ngaihna laiah an in peih reng dawn a ni, a ti bawk.

Dr.H.Lallenmawia, Sr. Consultant, DM&R pawhin he hunah hian lirnghing chungchanga hriattur tulte a sawi a. Er. David Ramnunsanga, Director ZEDA hnen atangin Solar Street Light leh Study Lamp chungchanga hriattur tulte ngaihthlak a ni a. Lirnghing tuar khua khawtlang hruaitute chuan lirnghing vanga harsatna tawk mekte a hmun ngeia kalchilha tlawhtu P&E Minister chungah lawmthu sawiin, an mamawh em em eng pe thei hmanraw hrang hrangte P&E Minister in a rawn chhawpchhuah sak avangin lawmthu an sawi bawk a ni. Minister chuan a department chan atanga mamawh thlente chu lo enzuia a tul anga hmalakpui a tum thu a sawi a ni.

P&E Minister Pu R.Lalzirliana hi Pu Rochhunga Ralte, Vice Chairman, Land Revenue & Survey Board, Dr. H.Lallenmawia, Sr. Consultant, DM&R, Er. David Ramnunsanga, Director ZEDA, Er. Lalzorama, SE P&E Champhai Power Circle, Er.J.H Malsawma PD ZEDA, Dr. Lallawmkima DIPRO, Pu Obed Lalmalsawma SDC leh Official dang te'n an tawiawm a ni.