No.1754/2021-2022
Lunglei 9th Aug. 2021 : High Powered Committee Lunglei leh Agriculture Department tangkawp buatsaih Bekang chinna tur Project “Intensive Cultivation of Soyabean” chu vawiin khan High Powered Committee Vice Chairman Pu Lawmawma Tochhawng chuan Agriculture Conference Hall Lungleiah a tlangzarh.

Hawnna hun hi Lunglei DAO Pu C. Malsawmkiman a kaihruai a, khuallian Pu Lawmawma Tochhawng chuan kuthnatawktute leh Department lama thawktu kalkhawmte hnenah fuihna thu sawiin, leilung leh kan nunna hi a inzawm tlat tih kan hriaa chu chu a taka kan chan tir loh chuan kan daih rei thin lo. Sawrkar leh Department ten hma an lakna hrang hrang tihlawhtling turin thlawp tha ila State pawn atanga kan lakluh thin tam tak hi tihtawp tumin Lunglei intodelh tumin bul i tan tha leh ang u, a ti. Mizo Bekang thar chhuah chi ngei mai Mizo bawkin an ching tur hi a lawmawm hle a ni Pu Lawmawma Tochhawng chuan tiin, thlai kan chin hian hlawhtling turin leitha leh thil dang tam tak mamawh a ni thin a, chumi bakah an mamawh pawimawh em em chu a neitu thlan tui a ni tiin, chu thlantui chu kan thlai te kan pe tel ngei ngei tur a ni a ti. Thlai chi leh thil dang dawngtute chu khawtlang leh District in a chhawr ngei theihna tura Pathian tanpuina nen theihtawp chhuah turin a sawm a, Bengkang chi leh a enkawlzuina tur thil pawimawh hrang hrangte Bekang ching tura thlan te hnenah hian a sem nghal a ni.

Intensive cultivation of Soyabean hawnna hunah hian Pi Baby Lalremkimi, ADAO Lunglei pawhin report pein Lunglei District chhunga Bekang chinna tur chu Hectare 25 a hma lak tur a nih thu leh khaw thlan bik Dawn, Buarpui leh Kawlhawk atangin loneitu mi 100 thlan chhuah an nih thu a sawi a, an ni hian Bekang chi, Sprayer leh hnim hlo bakah lei tha an dawng bawk dawn a. A hlawhtlin ngei theih nan Dept. lam thawktute pawhin ngawrh zawk a vil an tum thu a sawi a ni. Report a tarlan danin Bekang chu chakna pai tam mihring tana chaw tha a nih avangin tam zawk thar chhuah a ni a, a chi a intodelh tura hmalak bakah lei da tawh tih that lehna hman raw tha tak a nih avangin he hmalakna hi uar zawka kalpui tum a ni