No.1753/2021-2022
Kolasib dated 9th August 2021: Vawiin chawhma khan Dr.H.Lalthlangliana, Deputy Commissioner, Kolasib District chuan a pisaah thuthar lakhawmtute kawmin ramria buaina thleng chu Mizo leh Non-Mizo inkara boruak tha lo siamtu ni lo tura a duh thu a sawi.


Dr.H.Lalthlangliana chuan ramria buaina thleng avanga lirthei lut tur ten harsatna an tawh chuan ziaawm lam a pan tawh thu a sawi a,” Tukin zing dar 10:00 AM thleng khan lirthei, Vairengte Police Check Gate paltlang 473 an awm a, heng zingah hian bungraw phur Truck lian 131 an tel a ni,” a ti a, LPG phur 4 leh Oil phur 30 an tel thu leh Silchar-a tangkhang Mizo truck leh lirthei dangte pawn tukin khan Vairengte an paltlang tawh thu a sawi bawk a ni.


Kolasib DC chuan ramri chungchanga sawrkar leh sawrkar indawrna thila harsatna thleng a nih thu sawiin “He buaina hi Mizo leh Non-Mizo inkar emaw Mizo leh Assamese inkar a ni lo” a ti a, Mizoram hmel tibal thei zawngin mimal leh Pawl hrang hrangte chu hma la lo tura ngenin ,” Lirthei lo lut chho mekte pawh tha taka lo mikhual a, hnam dang hnathawk kan chhawrte chungah pawh harsatna siam zawnga khawsa lo turin Mizoram mipuite kan in ngen a ni,” a ti.


Nitin mamawh phur lirtheite tluang taka lo lut belh zel tura beisei ni mah se Dr.H.Lalthlangliana chuan POL inpek chhuah chu Kolasib district chhungah chuan khuahkhirh chhunzawm a la nih rih tur thu a sawi a, hei hi hrileng kara Petrol Pump-a mipui pun khawmna a thlen lohna tura ruahman a nih thu sawiin petrol dilna te erawh huap zau zawk a pekchhuah zel tum a nih thu a tarlang bawk a ni. Hrileng dona kawngah Kolasib district chhungah chuan SOP ngai hman chhunzawm tur a nih thu sawiin Executive Duty leh VLTF-te pawh an duty-na ngaiah an duty chhunzawm tur thu sawiin mitin fimkhurna kawngah tan la chhunzawm zel turin a chah bawk a ni.

Attachment

  • Loading attachment...