No.7551/2020-2021 

Vawiin khan Lunglei HPC Vice Chairman Pu Lawmawma Tochhawng chuan HPC Lunglei, Horticulture Department leh RD Department-te hmalaknaa buatsaih Lungsen khuaa Aieng sawngbawlna hmunpui ‘Lungsen Turmeric Processing Plant’  a hawng.

HPC Vice Chairman hi Lunglei atangin Pu L Lalhmingmawia Pachuau, Deputy Director, Horiculture Department leh District official dangte, Lunglei HPC Member pahnih Pu H. Lalthansanga leh Pu F. Lalsawmkima ten tawiawmin hawnna inkhawm ah hian Lungsen kuthnathawktute,tlawmngai pawl aiawhte leh khawtlang hruaitute an tel a ni.

‘Lungsen Turmeric Processing Plant' hawnna inkhawm Pu Lalzuiliana,Secretary, Lungsen Aieng Farming Cooperative Society Ltd kaihhruaiah HPC Vice Chairman chuan thu sawiin hmasawnna daih rei kan neihna tur leh ram leh hnam hmasawn zelna turin ei leh bara kan intodelh a pawimawh hmasa ber a ni,a ti a. HPC Lunglei pawhin ei leh bara kan intodelh theihna turin theihtawp a chhuah zel dawn a, kan kutkawih ngeia kan thar leh siam chhuah, project tha leh tlo kalpuia mipui tam zawkte tana eizawnna ngelnghet siam sak hi kan tum ber a ni, a ti a. Ei leh bara Lunglei District a intodelh theihna tura hmalaknaa hlawhtlinna hmuh chhoh mek chu lawmawm a tih thu sawiin hemi atana Chief Minister, Lunglei HPC Chairman ni bawk Pu Zoramthanga phur puina leh hmalakna avanga hetiang dinhmun thleng thei an nih thu a sawi a. Lungsen Aieng Farming  Co - Operative Society Ltd.te hmalaknaah duhsakna hlanin taima taka hmathlir thui tak neia hmalak chhunzawm turin a chah a ni.

Vawiin program-ah hian Pu L Lalhmingmawia Pachuau, Deputy Director, Horiculture Department chuan Technical Report pe in Pu Lalvansanga,DHO Lunglei chuan lawmthu sawina hun a hmang bawk.

Lungsen Aieng Farming  Co - Operative Society Ltd. hi kum 2012 ah din niin tun dinhmunah member 19 (hmeichhia -5 leh mipa - 14) an awm mek a ni.

Lungsen leh a chhehvela kuthnathawktute  Aieng tharchhuah tangkai taka hman a nih theih nan kum 2014 khan DRDA Lunglei leh BDO Lungsen chuan BADP hnuaiah Aieng herna khawl leiin, a in tur pawh kum 2015-16 khan Cheng Nuai 5.00 hmangin sak a ni a. HPC Vice Chairman Pu Lawmawma Tochhawng kaihhruaiin nikum 2020 khan heng hmalakna lo awmsate hi HPC Lunglei leh Horticulture Department tangkawp chuan chhunzawm hna an thawk a. Nikum 2020 November thla khan Reiek Turmeric Grower Society hruaitute nen he khawl rem khawm leh a fit hna thawh a ni ta a.Lungsen Village Council I & II Member te, NGO te leh mipuite nen, Lungsen Aieng Farming Co-operative Society Ltd. member ten lungrual taka hma la hovin, a tul hunah hnatlang te neiin Aieng her theih a lo ni ta a ni.

Lungsen Aieng Processing Unit Aieng herna khawl hi 18 HP a chak, PILOT INDIA, KERALA siam HM15 HAMMER MILL a ni a. Darkar 1 ah Aieng dip Quintal 1 her theiin, ni 1 ah Quintal 8 – 10 pawh a her thei a ni. Aieng hring 5 - 6 Quintal atang hian Aieng dip Quintal 1 a herchhuah theih a, kan hriat lar tak Reiek a Aieng herna khawl nen a her chak zawng a inang vel a ni. Aieng herchhuah te hi chemical tel lo a chin leh sawngbawl 100 % ORGANIC a ni. Aieng hi gram 300, 200, 100 leh 50 a pack niin, retail price Rs 90, 60, 30 leh 20 a ni a, wholesale chuan hei ai hian a la tlawm zawk theih beisei a ni.

Horticulture Department chuan Mission for Integrated Development of Horticulture (MIDH) hnuaia Low Cost Preservation Unit scheme atangin Turmeric Slicing machine, Pu Ramdinmawia, VB Agri, Haulawng siam Rs 35,000 man te, Dekchi lian te, a pho rona tur Silpauline te, a bukna Digital Weighing Machine te, a pack na leh a label te, a seal na te ngaihtuah in, signboard leh Aieng her tur leina pawh pe in, Food Safety Standards Authority of lndia (FSSAI) Registration pawh tihfel a ni ta a. A phorona tur Solar Dryer pawh nei thei turin hmalak mek a ni bawk.