No.7550/2020-2021

Vawiin chawhnu khan National Bank for Agriculture and Rural Development (NABARD) Mizoram buatsaihin District Level Sensitization on Rural Infrastructure Development Fund chu DC Conference Hall, Kolasibah neih a ni a. Dr.H.Lalthlangliana, Deputy Commissioner chu khuallian niin Kolasib district chhung a department hrang hrang hotute an tel a ni.

Khuallian Dr.H.Lalthlangliana chuan Sawrkar hnuai a department hrang hrang awmte tih hmasawn chu a thawktute taimaknaah a innghah thui hle thu sawiin an remhriatna leh thiamnate hmang tangkai a RIDF leh sum lu dangte pawh Mizoram mipuiten an chhawr tangkai theih nan ngaihtuahna seng tam turin kalkhawmte a chah. RIDF chungchanga NABARD Mizoramin zirtirna an buatsaih chu lawmawm a tih thu sawiin he hun a department hotu telte chu a tak a hmang tangkai ngeitu ni turin duhsakna a hlan nghal bawk a ni.

Pu JD Traite, District Development Manager, Kolasib district chuan kalkhawmte lawmna thu sawiin Rural Infrastructure Development Fund leh Warehouse Infrastructure Fund hnuaia hmalakna hrang hrang tarlanna hun a hmang a, Pu O.P.Mounglang, Assistant General Manager hnen atangin RIDF kalphung leh hemi hnuai a hna kalpui dan turte ngaihthlak a ni bawk.

RIDF hi thingtlang leh kuthnathawka eizawngte tih hmasawnna tur atan a duan niin hemi hnuaiah hian mipui mamawh dan a zirin fund pek chhuah pawh hi țhuang thum a then a ni a. Agriculture leh a kaihhnawih hnuai a fund te hi RIDF hnuaiah zaa 95 tum sakin zaa 5 chu state sawrkarin a tum a ngai a, Social sector hnuaiah zaa 85, hmarchhak state tan zaa 90 tum sakin Rural Connectivity, thingtlanga inkalpawhna kawnga hmalaknaah zaa 80 emaw hmarchhak state tan zaa 90 a tum sak thin a ni. RIDF hi 1995-96 atanga kalpui tan niin hmalakna hlawm 37 a then hnuaiah hna kalpui thin a ni a. Mizoram chhungah hian ni 15 February 2021 thleng khan RIDF atanga sum 1406.35 Crore hmangin project 522 kalpui tawh a ni. Kolasib district chhungah hian RIDF XXIV leh XXV hnuaiah hian AH & Veterinary department hnuai a District Veterinary Hospital sak te, School Education department hnuai a school sak that te, Health department hnuai a PHC sak te kalpui mek a ni a, inkalpawhna tha a awm theih nan Meidum-Hortoki kawng laih te, Khamrang-Hunthar kawng siamte leh hmun thum laiah lei dawh hna kalpui a ni bawk a ni. Heng bakah hian Minor Irrigation department leh Horticulture department kaltlangin hmalakna engemaw zat kalpui tawh a ni.