No.2331/2020-2020

Vawiin chawhma dar 11:00 khan Lunglei HPC Vice Chairman Pu Lawmawma Tochhawng chuan pianphunga rualbanlo mi thenkhat te hnenah Wheel Chair a hlan. Heng wheelchair-te hi HPC hnuaia hnathawktute leh mi inphal te thawhkhawm HPC Relief Fund atanga ruahman a ni.

Hemi puala inkhawm tawi Vice Chairman HPC Office Chamber-a neihah Pu Lawmawma Tochhawng chuan HPC Relief Fund-a phal taka sum thawh khawm tute chungah lawmthu sawiin he an inpekna avang hian mi tam zawkten midang tana luan chhuah duhna rilru an put phah ngei a beisei thu a sawi a. Pianphunga rualbanlote tanpui leh dawmkan chu mitinte mawhphurna a ni tiin heng wheelchair-te hi a dawngtuten tangkai taka an hman theihnan duhsakna a hlan a ni.

HPC Vice Chairman chuan tun dinhmun atan chuan Lunglei HPC Fund chu ei leh bara kan inphuhruk theih nan hman nasat niin, helamah hian a tam zawk hman zel rih tum a ni, a ti bawk.

Vawiin HPC Vice Chairman in Wheel Chair a pekte hi Pi Dosiami, Ramthar, Lalnunpuia, Rahsiveng leh Pu C.Hrangchhinga Zobawk te an ni. Wheel Chair hlanna inkhawmah hian Official-te, Party hruaitu te, leh Media te an tel a ni.