No.2330/2020-2020

Siaha; June ni 23: Tukin zing khan Siaha bialtu MLA leh Minister of State for SWD,AH& VETY, Excise and Narcotics.. etc. ni bawk Dr. K.Beichhua chuan Siaha District Hospital complex a TrueNat Quattro Laboratory bunna tura hmun hma chu sawrkar tirh Expert Team Member Dr. H.Lalhlenmawia, HoD, Dept of Pharmacy, RIPANS, Zemabawk, Dr. Vanramliana, Asst Professor, Dept of Zoology, PUC leh Dr. RSC.Vanlalruati, Microbiologist, Civil Hospital, Lunglei te hovin an enfiah. Expert team te hian TrueNat Quattro khawl bunna tur hmun hma te an enfiah a, an hmuhdan report kimchang hi Health & Family Welfare Minister hnena an thehluh hnuah, TrueNat Laboratory hi Siaha-ah bunfel thuai anih tur thu Minister leh Expert team te hian an sawi.

Minister Dr.K.Beichhua chuan vawiin hi Siaha district tan ni chhinchhiah tlak a ni. TrueNat khawl hi Covid-19 hrik chauh ni lovin, TB,HIV, Typhoid, etc..leh natna chi hrang hrang 16 lai test nan a hman theih a ni dawn a. Natna hrik hmuhchhuah theih loh avanga sum tam tak senga hmunpui zawk kan pan thin te pawh he khawl kan bunfel hunah chuan a lo ziaawm tawh dawn a ni, a ti.

Minister chuan TrueNat Labaratory bunna tur enfiahna programme-ah thu sawiin, Covid-19 lockdown avangin, mi tamtakin hun thawl an ngah a, chu chu mi thenkhat hian an hmang thiam lo a ni. Kan CM zahawm tak Pu Zoramthanga'n a rilru leh ngaihtuahna zawng zawng senga zantairek thleng thlenga hna a thawh thin te, ZCM Lab technician te leh district hrang hranga medical team ten Covid-19 hrik kai palh theih dinhmuna rim taka hna an thawh thin te, covid-19 dona kawnga ahmatawnga thawktu zawng zawngte inpekna pawh zah zo lova, thil hrechiang hauh si lova, a hre ber ang ziazanga dawt ngialngana social media a thu ziak vak vak leh post vak vak thin mi te hi; Covid-19 hrik ai pawha mi hlauawm zawk an ni. Hetiang mi hi han bel chiang i la, Covid-19 dona kawnga thawhhlawk lo ber ber te an ni duh chawk a ni. Covid-19 hrik hi politicise chi a ni lo, lungrual taka do tlan chi zawk a ni.

Tumah inpuhmawh tawn lovin, theihtawp kan chhuah theuh tih inhriatpui tawnin, i tang tlang zel te ang u khai. Vawiin thlenga covid-19 hri a vanga Nunna chan pakhat mah kan awm lo te hi kohhran te tawngtaina leh Covid-19 dona kawnga thawktu zawng zawng te inpekna a vang liau liau a ni a. Tuna Covid-19 hri vei mek te pawh dam vara an lo chhuah vek hi ka beisei tlat a ni.

Tun kan dinhmun chinah pawh hian Pathian hnenah lawmthu i sawi mawlh mawlh ang u, a ti bawk.

Dr.Vanramliana chuan thu sawiin, Cabinet meeting-a Mini RT-PCR TrueNat Quattro khawl chungchanga report expert team in an pek zawh veleh, Minister Dr.K.Beichhua chuan thingpui inpuia a sawm nghal thu leh, a tuk maia TrueNat Quattro book na copy a lo thawn hman thu tarlangin, Minister hi a viak a tha tak zet a ni, a ti a. Dr.Vanramliana chuan sawi zawmin ZCM a RT-PCR khawl bunfelna-a core team-ah atir te atanga tel ve thu leh ZMC a Lab. Technician ho thawhrim zia leh zinglam dar 2:00/3:00am thleng thlenga hna an thawh thin hriatpuitu a ni thu a sawi a. Manipur state chuan Labaratory 3 an nei a, an test tam tumin nikhatah 1000 vel an test thei a. Mizoram chuan Labaratory pakhat chauh kan nei chungin nikhatah 700/800 vel kan test thei a ni. Hei hian ZMC Lab. technician te thawhrim zia a pholang chiang hle a ni, a ti. Swab sample an lak te hi dah rei chuan; chhe theih ang a sawi te a awm thin, hei hi thildik lo a ni. Swab sample te hi (Minus degree Celcius ) -80'C a vawn that a ni a, a chhe thei lo a ni, a ti.

TrueNAT quattro khawl hi TB hrik enna khawl thin kha a ni a. Tlem siam danglam hret a ni hnuah Indian Council of Medical Research (ICMR) in kumin April thla a Covid -19 hri test nan hman tlaka a pawm chauh kha a ni a. A la thar tha viau a ni. TrueNat khawl hi Khai sawn theih niin, Biosafety level 3/2- laboratory ni kherlo, Laboratory changkang lutuk lovah pawh hman theih a ni a. He khawl hi a len leh tet a zirín- single channel leh four- channel (Quattro machine) a awm a. Quattro machine hian, nikhatah sample 40 vel a test thei dawn a ni. He khawl vil tur hian Thawktu tam leh Laboratory changtlung tak pawh a ngai lem lo a ni. Covid-19 hripui hi lo reh pawh nise, he khawl hi kan hmang tangkai thei zel dawn a. TrueNAT-Quatro khawl hian mihring natna chi hrang hrang-16 lai check nan a hmanzui theih dawn a ni.