No.2329/2020-2020

Dated Serchhip, the 23rd June, 2020: Vawiin hian Mualcheng Farming Co-operative Society Ltd. bul tuma an khaw mipuite thlai thar thawhkhawm chi hrang hrang te chu district chhunga quarantine centre hrang hranga awm mekte tan DLTF kutah an hlan a, Pu HD Lalpekmawia, Addl. DC leh Pi C. Lalduhzuali, SDO(S) ten an lo dawng a ni.

Mualcheng Farming Co-operative Society Ltd. aiawh hian an Chairman Pu H. Lalsiama leh Secretary Pu Chengkhawsiama te thawk chhuakin, thlai thar chi hrang hrang: Antam 192 kg, Maian 12 kg, Thip purun tel 16, Hmarcha 11 kg, Phuihnam 18kg, Chingit 25 kg, Bahkhawr tel 12, Tumbu pum 28, Balhla thlar 2, Thingfanghma pum 28, Theite 21 kg, Pudina tel 1, Chengkek pum 10, Sawhthing 25 kg, Dhania tel 8, Dawlzik tel 2, Chakawk tel 1, Sapthei hnah tel 1 leh Pear 5 kg an hlan a, Chingit leh Tumbute hi society hruaituten hnatlanga an zawn a ni a, a bak zawng hi khawtlang mipuiten feh haw paha tlai khata an thehkhawm a ni.

Pu HD Lalpekmawia, Addl. DC chuan DLTF Committee aiawhin thilpek hlantute hnenah lawmthu a sawi a. Hun harsa tak kan tawh laia kan harsatna te inhriatpui tawna, midang tanpui duhna thinlung nei an awm reng chu lawmawm a tih thu a sawi a. An thilpekte hi tangkai taka hman a nih tur thu a sawi a a ni.

Mualcheng khaw mipuite hian vawiin vek hian Aizawl Bawngkawn Venga Quarantine Centre awm te hnenah Serchhip District tana an pek ang zat chiah khi an pe bawk a, Bawngkawn Local Task Force hnenah an hlan a ni. Bawngkawn lama thilpek hlan tur hian Society Assistant Secretary Pu Lalrengpuia Colney leh Executive Committee member Pu H. Lalbiakvela te an kal a ni.

Mualcheng Farming Co-operative Society Ltd. ah hian chhungkua 156 an intelkhawm a, Primary Agricultural Credit Society (PACS) neiin he PACS ah hian deposit pawh nuai za (100 lakhs) dawn an nei tling tawh a, members ten tangkai takin eizawnna bul tan nante, hma thar lak nan te an hmang tangkai hle tawh a ni.

Attachment

  • Loading attachment...