No.252/2021-2022

Lunglei the 24^th April, 2021- Lunglei HPC Vice Chairman leh Lunglei East AC bialtu MLA ni bawk Pu Lawmawma Tochhawng chuan vawiin chawhnu khan a bial chhunga Electric Veng, Lunglei a tlawh. HPC Vice Chairman hi AH&Vety Department Southern Zone Jt Director Dr Vanlalbuanga leh offical dangte, HPC member-te, leh party hruaituten tawiawmin Electric Veng khawtlang hruaitute leh tlawmngai pawl hrang hrangte nen thutkhawmna hun an hmang. 

Electric Veng Lungleiah hian vawk natna hri African Swine Fever (ASF) leng mekin AH & Vety Department chuan 12^th April 2021 khan Electric Veng hi Infected Area-ah puangin 20^th April, 2021 khan ASF Epicentre ah a puang a ni. Pu TBC Sanglura, Electric Veng VC Secretary-in a report danin vawk hrileng avanga Electric Venga vawk thi chhinchhiah hmasak ber chu April ni 8, 2021 kha niin vawiin thlengin chhungkaw 33 ta vawk 74 an thi tawh a ni. 

Pu Lawmawma Tochhawng chuan vawk hrileng avanga mipuite harsatna nasa tak tawh mek chu a tawrhpui takzet thu sawiin he hrileng darh zel lohna turin sawrkar chuan theihtawp a chhuah mek a ni, a ti a. Electric Veng khawtlang hruaitute, tlawmngai pawlte leh mipuite tlawmngaihna chu fakawm a tih thu sawiin vawk thi sawngbawl chungchangah leh hri darh zel lohna tura fimkhur tul ah te AH&Vety Department mithiamte thurawn la hmasa zel turin a ngen a. Kalkhawmte chu thawhho pui leh hmalak pui chhunzawm zelah a sawm a ni.

Electric Veng khawtlangin vawk hrileng an tawrh mek chhawmdawl nan Pu Lawmawma Tochhawng chuan pawisa fai a hlan a. Hemi bakah hian Lunglei District Faina Hapta 2020, puala intihsiakna neihah Electric Veng chu Commercial Area-ah Pakhatna an nih lawmpuinan pawisa fai cheng sing nga (Rs. 50,000/-) a hlan a. Hemi bakah hian tun hnai maia HPC Cup 2021-a an Champion lawmpuinan pawisa fai cheng sing hnih (Rs. 20,000/-) a hlan bawk a. Heng lawmman dawng thei tura theihtawp chhuahtu Electric Veng khawtlang hruaitute leh mipuite chu chhuanawm a tih thu sawiin an chungah lawmthu a sawi a ni.  

Dr Ngurzidingi Sailo, CVO, AH&Vety Lunglei –in vawiin (24/04/2021) chhun a report a tichhuaha tarlan danin Lunglei khaw pumah vawk 204 an thi tawh a, Lunglei khawpui chhung veng 15 atangin vawk thi report awm tawhin Electric Veng, Rahsiveng leh Salem Veng te chu vawk thi tam berna veng te an ni. Lunglei khawpui chhunga vawk thi te hi a bialtu Veterinary Field Assistant-te kaihhruaiin National Action Plan for Control, Containment and Eradication of ASF-in phum dan tur inkaihhruaina a siam anga phum an ni a. Mahni huan neite chuan an huanah vawk thi te hi phumin, a phumna hmun neilote tan khawtlang hruaituten an venga hmun remchangah phumna an ruahman sak a. Electric Vengah chuan AH&Vety Department ram chhungah phum niin helai hmun hi veng dang te tana hman ve theih tura ruahmanna kalpui an duh thu vawiin meeting-ah hian AH&Vety Department hotute chuan an sawi a. Vawk thi phumna tur burial ground dang Riangvai thlanmual thlanga UD&PA bawlhhlawh paihna hmunah siam tum anih thu AH&Vety Department Southern Zone Jt Director Dr Vanlalbuanga chuan a sawi a ni.   

Dr George Martin Lalruattluanga, Veterinary Officer Tlabung-in vawiin (24.04.2021) chawhnu dar 1:00 a report a tih chhuahah Lungsena vawk thi tawh zat hi a zavaiin 643 niin vawiin (nimin chawhnu dar 1 atanga vawiin chawhnu dar 1) bika thi chu 19 an ni a. Report hnu hian thih belh engemawzat an awm bawk a ni. He report vekin a tarlan danin Lungsenah vawk la dam lai 369 an laawm mek a ni. 

Vawk leh ran damlo leh vawk thi rinhlehawm leh vawk tawlh ruk a rang thei ang bera a hnuaia phone number tarlante kaltlanga report turin Lunglei DLCC chuan Lunglei District mipuite a hriattir a ni.

Lunglei District Rapid Response Team: