No.7458/2020-2021
Nimin Inrinni (6 Feb 2021) khan Pu Lawmawma Tochhawng Vice Chairman HPC in Zawlpui a Thlai chingtuten tui an mamawh dan leh Kau lui chunga tuilianin lei a tih chhiat dawh thar leh dan turte a en.
Pu Lawmawma Tochhawng hian Zawlpui zau a thlai chinna hmun hrang hrangte tlawhin tui an mamawh dan leh tui lak theih dan turte a en a, HPC sum hmanga tui lak a nih tur thu sawiin, kumin thal chhunga la turin hmalak a ni ang, a ti.
Zawlpui zau a thlai hmun neitu mi 10 chuangte tan Kau luia tui pump chhuakin, tui dah khawlna siamsak an ni ang a, heta tang hian mahni ram theuhah tui hi an la ang. He tui lak tur hian Zawlpui zau a thlai hmunte a chawm thei deuh vek dawn a ni.
Pu Lawmawma Tochhawng hian Kau lui a mihring kal kaina Lei kum 10 chuang kalta a AMFU in an dawh, kum 2017 a tuilianin a tihchhiat chu a hmunah a en bawk a, khawtlang hruaitute leh kuthnathawktuten Lei chhiat avanga harsatna an tawh dante hriatpuiin, a hma thei ang berin HPC sum hmangin Lei dawh a ni ang, a ti.
Nikum khan covid 19 avanga kuthnathawktu ten harsatna an tawh dan hriatpuiin, Pu Lawmawma Tochhawng hian HPC fund atangin cheng nuai 10 chuang man thlai chi leikhawm sakin, Lunglei district hmun hrang hrangah sem a ni a, Zawlpui a kuthnathawktu ten heng thlai an chin atanga an tharchhuahte vawmkhawmin Pu Lawmawma Tochhawng hnenah lawmthu sawinan, thlai chi hrang hrang an lo pe.
HPC Vice Chairman hian Zawlpui leh Putlungasih ramchhung hmun hrang hranga Sangha dil siam theih dan turte a enkual bawk a, Agriculture Department leh Fisheries Department a hotuten an zui a ni.
Attachment
- Loading attachment...
