No.4025/2021-2022

Aizawl the 17th February’ 2022 : Nizung chakna hmanga tuilakna Ralvawng Water Supply Scheme NABARD sum, cheng Nuai 270 senga siam chu vawiin khan Lunglei High Powered Committee Vice Chairman, Pu Lawmawma Tochhawng chuan a hawng.

Hawnna inkhawm Ralvawng khelmuala neih chu Er. Ngentluanga, Superintending Engineer, PHED, Lunglei in a kaihruai a, Khuallian Pu Lawmawma Tochhawng chuan thu sawiin a bial chhung Ralvawng khua tui harsatna ber khuain tui hniang hnar an nei ta chu a lawmpui thu  sawiin sawrkar chungah pawh lawmthu a sawi. Pu Lawmawma Tochhawng chuan he tui lakna hna hmu tur hian a kawng a bumboh hle a, hmachhawp dang dangte pawh a umzuitu an awm loh chuan a thamral thin a, chutih laia he project lian tak tih hlawhtlina awm hi mipuite pawhin lawm nachang hriat a tul tiin, a enkawl kawngah pawh mahni ta a ni tih hria a, duat taka enkawl a tul thu a sawi.

HPC Vice Chairman chuan a sawi zelnaah he hmalakna hlawhtlin nana theihtawp chhuahtu PHE Department te hnathawh chu ropui a tih thu sawiin hemi atana bul tumtu PHE Minister Pu Tawnluia chungah lawmthu a sawi a, tui harsatna nei tawh lova kawtkaia insuk, inbual leh intur tui thianghlim an dawng thei ta chu Ralvawng khawtlang hmasawnna ropui tak a ni a ti.

Project enkawltu Er. Laltlanchhunga, Sr.Executive Engineer, PHED, Lunglei pawhin tuilakna hna an thawh dan report pein Ralvawng Water Supply Scheme chu mi 489 chawm thei tura duan niin kum 2049 thleng hman theih tura ruahman a nih thu a sawi a, tui hi Uilui atanga lak niin M/s P&V Engineers Pvt. Ltd ten he hna hi an thawk a, kum nga chhung an enkawl hnuah Ralvawng WATSAN Committee te kutah hlan a ni dawn tih a sawi a, he scheme hi 2020 July ni 1 ah tan a nih thu a sawi a ni.

Khuallian Pu Lawmawma Tochhawng hian Ralvawng khuaa Pawl hrang hrang MUP, MHIP, Sports Commttee leh YMA te hnenah thil pek a pe bawk a ni.