No.4026/2021-2022
Aizawl, 17th February 2022 : Vawiin khan Food, Civil Supplies & Consumer Affairs Minister Pu K. Lalrinliana chuan Hmuifang leh Chhipphir ah te Department hmalaknaa NABARD loan hmanga a sak thar Supply Centre - Kudam leh Quarter te a hawng a. Hmuifang Kudam hawnnaah Aizawl South III bialtu MLA Dr. F Lalnunmawia leh Chhipphir Kudam hawnnaah Lunglei North bialtu MLA Dr. Vanlaltanpuia te an tel a ni.
Heng hmunah ah te hian Supply Minister Pu K. Lalrinliana chuan Sawrkar tirh tana Department mawhphurna a lakin Supply Kudam tam tak chhe tawh lutuk leh a hul that loh avanga buhfai chhe thin chu ngai mawhin a sak that dan kawng hrang hrang a dap dan te a sawi a. Chung kudam sak that ngai 65 atangin 10 sakna tur chu 2019 khan Central Sawrkar atanga hmuh a nih thu te, a bak 21 sakna chu NABARD loan atanga sak mek anih thu te a sawi a. Mizoram hmun tam taka kawng sial mek anih avangin kum danga kudam 50 vela fur daih tur buhfai chhekkhawl chu kuminah chuan kudam 70 velah Monsoon Stock dah a ngai dawn a tiin hei hi dah mek a nih thu a sawi.
Thla tin Sawrkarin mipui hnenah buhfai quintal nuai 1 leh sang nga vel a sem thin thusawiin BPL, AAY bakah Scheme dangte pawh a awm, Open Market Price atangin engemaw zat kan lei bawk a. Sawrkar chuan Mizoram tharchhuah buhfai chu OMP a lei a duh vek a, mahse lei tur kan hmu mang lo, kan ei tur buhfai kan la tharchhuak tlem lutuk hi a lungchhiat thlak a, tan lakna tur a tam hle a ni, a ti. Vietnam ah pawh tlangram chhengchhe tak taka terrace siamin buhfai an tharchhuak tam a, Mizoram ah pawh kan tum chuan kan theih loh thu a awm lova, chuvangin buhfai tharchhuah tam hi kan rilru ah a len a ngai a ni, a ti.
Minister chuan ei leh bara intodelh a pawimawh zia, chumi atana buhfai tharchhuah tam chu kawng pawimawh tak a nih dan te a sawi a. Oil leh Gas mamawhna sang zel phuhruk nan Oil Depot hmun tur te leh LPG Bottling Plant tihlen te chu Sawkarin a ngai pawimawh tiin hma a lak dante a sawi a. Godown thar hawn tak te leh nakin lawka hawn mai tur adang 19 te chuan mipui mamawh ber buhfai him leh hul taka chhekkhawlna kawngah mipui tan a tangkai leh zual dawn tiin a vilna leh enkawlna kawngah te a khaw mipuiten tan lakpui se tiin a duh thu a sawi a ni.
Dr. F. Lalnunmawia chuan hripui karah pawh buhfai leh gas supply a that thu sawiin hei hian Supply Minister hnathawh that leh inpekna a tilang hle a ni, a ti. Dr. Vanlaltanpuia chuan a bial chhungah Kudam tha tak sak a nih thu sawiin Minister hi lawmthu a hrilh a ni.
Hmun hniha programme hman te hi Pi Ramdinliani, Director, Food, Civil Supplies & Consumer Affairs chuan kaihruaiin Kudam sak dan chanchin tlangpui a sawi. Chhipphir programme a Ration card chungchangte, card hrang hrang hnuaia hamthatna te leh mipui inah Ration Card chungchanga an hriat tur pawimawh thil hrang hrang hrilhhriatna awareness hun a hmang bawk a ni.
Hmuifang Supply Centre ah hian buhfai Metric Tonne 200 dah theihna Kudam bakah Store Keeper leh Chowkidar Quarters Building (chawng hnih) te leh Toilet Block te sak a ni a , a vaiin cheng nuai 140 bawr vel seng a sak a ni. Chhipphir Supply Centre pawh hetiang tho a sak a niin a sakna man hi cheng nuai 156 vel a ni.
Supply Department hian Mizoram pumah Supply Centre 121 an nei mek a, chung zinga 21 chu sak that mek a ni a. Heng Kudam 21 sak that te zinga hawn hmasak ber chu vawiina hawn Hmuifang Supply Centre a ni. Heng Supply Centre 21 te Babie Construction & Consultancy Services an ni a, a project pumpui hi cheng vaibelchhe 39.61 hu man a ni a. Kudam tam zawk chu March 2022 ral hmain sak zawh an beisei a ni.
Attachment
- Loading attachment...
