Ni 12 April, 2016-a tan 6th HPC Cup chu vawiin Thuamluaia Mual, Lunglei-ah khar a ni a, MFA Sr. Adviser Pu PC Vanlalhruaia chu Khuallian niin HPC Vice-Chairman Pu S.Laldingliana chu Khual Zahawm a ni. HPC Cup kharna hunah hian Lunglei West bialtu Pu Chalrosanga Ralte bakah MFA officials te leh Lunglei District-a sorkar officials engemawzat an tel.

HPC Cup 2016 kharna inkhawm LDFA Vice-President Pu Jimmy Sailo kaihhruaiah Khuallian Pu PC Vanlalhruaia chuan Lunglei-in a bik taka district hmasawnna kawng hrang hranga hma la tur High Powered Committee a nei chu an vanneih bakah district dangte tan pawh awhawm tak a ni a ti a. Mizo thalaite hmakhua ngaiin sorkarin infiamna lamah pawh nasa takin a la mek chho zel a, football bikah phei chuan Mizo players-te an thlen san thu a sawi a. MFA hmalakna zarah Lunglei District atan AIFF D-Licence Referee Course leh Refereee Refresher Course te buatsaih a nih tur thu a sawi bawk.

Vawiina HPC Cup Final match-ah hian Venghlun leh Electric Veng an intum a, 1-0 in Electric Veng VC Team chuan kum zawnin vawiin khan a vawi 3-na atan HPC Cup Champion an ni.