Bairabi atanga khawthlang lam kalna tur Tlawng lui a ‘Double Lane PrestressedConcrete Single Box Girder Bridge’ dawh mek, mipui leh a enkawltu PWD pawhin nghakhlel taka thlir mek laia May 22, 2016, Chawlhni zing Dar 10:25 a tuilianin a lak chung changah, Chanchinbu leh Social Media thenkhatah thil hriat chian loh awma a lan avangin he Lei dinhmun hi sawifiah tula hriat a ni.
Bairabi Lei hi metre 40 kar dan zelah ban awmin,a vaia sei zawng chu metre 160 niin, metre 120 chu zawh tawh a ni a. Ban kar pakhat chauh hmabak thawh mek chu, Chawlhni zing dar 8 vel atanga tui lian lo zual thut, hnawl tam tak rawn len bawk chuan lui mawng atanga thira dona (staging) chu a hrut thlu a. A chung lama cement concrete May 20 a chhun thar chu amaha ding zo chi a la nih loh avangin, May 22, chawhma dar 10:25 khan a tla tel ta a ni. A hming ‘single box girder’ a ni ang hian he lei hi a lai kawrawng, a chhuat hnuai lam (sofit) chauh concrete chhun hman a ni a; ruahman ang chuan May 30-ah a sir tawn tawn bang (web) chhun a, June 8-10 chhungin chhuat chung zawk (deck slab) chu zawh tum a ni a.
Kuminah ruah a sur hma em avang leh tui lo lian thut thei anih avangin hnawl lo dang turin lui hnar sir lamah a danna siam a ni a. Inrinni pawh khan a bialtu SE, EE leh SDO chu a hmunah awmin, Bairabi mi hlawhfa ruaiin an thian fai a. Mahse a tuk Chawlhni zing lam dar 8 vel atanga tui lo lian chuan hnawl danna siam chu a chim pil vek a; mau sahna leh hnawl dang lo tam lutuk chuan ban pahnih inkara lei dona thir dawh chu a hrut thlu ta hlauh mai a, a vanduai thlak hle mai. He thilah hian a design emaw, technical thil lamah fel lohna a awm lova, khuarel chhiatna thil, tuma thunun theih loh chhiatna lo thleng hi Sawrkar chuan pawi a ti tak zet a ni.
He lei hi NEC atanga sanction dil nan Thir lei (Built-up Girder Bridge) tura ruahmanin Rs.612.50 lakhs sanction a ni a. Mahse han dawh tak tak dawn khan metre 160 laia sei atan chuan a tha tawk lova ngaiin, RCC double lane girder bridge tura siamtha lehin, chumi hmanga estimate siam that hmang chuan tender koh a ni a. Tender chhang hniamber chhanna milin Rs.1221.04 lakhs revised estimate siam a ni a. Hei bak hi estimate revise a awm lo. NEC lamin revised estimate a vaia an sanction loh avangin a daih bak chu State Sawrkar-in a sanction fel.
Contractor ABCI Infrastructure Pvt.Ltd hian harsatna hrang hrang vangin a zo har ta hle a. PWD lam pawhin nasa taka nawrin an vil nain, duh angin hna a sawt thei lova. Hna cancel lova zawh hram duhna avangin vawi engemawzat hun pawhsei sak a niin, June 2016 hi zawh hun tura hun pek belh hnuhnungber chu a ni. Mipui bakah Sawrkar pawhin nghakhlel taka a thlir laia hetiang natural calamity lo thleng ta thut hi Sawrkar chuan pawi a ti tak zet a. Tui kam ve leh hna chhunzawm lehnghal a ni ang.
