Pu R. Lalzirliana, Home Minister chuan vawiin khan ni li chhung (24 – 27 May, 2016) awh tur Mizoram Assembly Annexe building a Horticulture Department buatsaih Horti Fair 2016 chu a hawng. Hawnna inkhawm hi Recreation Hall, Aijal Club-ah neih a ni a. Pu K. Lalrinthanga, Parliamentary Secretary chu khual zahawm niin, Pu B. Lalhmingthanga, Secretary, Horticulture Department in inkhawm hi a kaihruai a ni. Pu Vanlalruata Chenkual, Deputy Director chuan Horticulture for Business tih thupui hmangin zirtirna a pe a. Horti Fair hi 2012 atang khan kumtin buatsaih a ni a, kumin hi a vawi 5 na a ni.

Pu R. Lalzirliana chuan Horticulture Department hi department naupang tak nimahse India ram hriat hlawh thei tur khawp in state pawnah Anthurium leh Rose te a thawnchhuak a. State Plan hnuaiah sum nei tam lo mahse Central Scheme hmang tangkaiin hma a sawn chho mek zel a ni, a ti a. Kuthnathawktu fapa a nih angin a ni pawh kut hnathawh lama a tui thu Minister chuan sawiin tuna Horti Fair buatsaih hi a tam thei ang berin an tlawh a, an thil hmuh leh zirte chu a taka an hman tangkai ngei a beisei thu a sawi.

Tun tuma Horticulture Fair hman ang hi khawvel hmun changkang leh India ram dangah an hmang fo thin a, tun tumah pawh hian sorkar officer liante leh sorkar hnathawk mahni hna a buai em em te, hmun danga kalchhuak hman lo loneitute leh huan lama tuimite tan pangpar leh thlai tiak tha leh hrisel awlsam taka an lo lei ve theih nan leh an lo phun ve theihnan he Fair hi buatsaih a ni. He Fair buatsaih anih chhung hian Department chuan sorkar hnathawk leh loneitute leh midang ten thlai chin dan leh enkawl dan an zir theih nan Seminar buatsaih nghal a ni.