2166/2024-2025

2024 Mimkut thla ni 23: Lunglei High Powered Committee (HPC) Vice Chairman Pu V. Malsawmtluanga chuan vawiin khan Lena Stadium, Lungleiah Baptist Higher Secondary School (BHSS) Annual School Sports 2024 hawnna hun chu Khuallian niin a hmanpui.

Khuallian Pu V. Malsawmtluanga chuan zirlaite leh zirtirtute 63rd BHSS Annual School Sports 2024 chibai bukin, infiamnain a tum ber - mawi tak leh rilru thianghlim tak nena theih tawp chuaha beih chu annual school sports chhunga a taka lantir tum turin a chah a. Zirlaite chu sikul aṭanga hnai teah sawrkarin khelmual ṭha a chhawpsak chu an vanneihzia hria a, ṭangkai taka hmang tura chahin, zirtirtu ṭha tak tak an nei chu an vanneihna pakhat a ni bawk tih hria a, zirtirtute thu awih a, taima taka lehkha zir zel turin a chah bawk a. Infiamna chu ei zawnna tling a ni tawh tih sawiin, zirlaite chu lehkhabu chhunga mi zir satliah ngawt lo va, infiamna leh sikul thil tih hrang hrang kal tlanga an tui zawng leh thiam zawng zawng chhuak a, talent an neihnaah theih tawp chhuah a, mi hlawhtling nih tum turin a fuih a. Zirnaah leh thil tihna hrang hrangah thiam thei bik awm theih a nih rualin, kawng hrang hranga intlansiaknaah pakhatna nih kher loh pawhin a tawp thlen tum tlat a pawimawh tih a sawi a. Zirlaite chu thawh rim hlawkzia a taka tawngtu an ni thei vek tih hrilhin, sawrkarin hna a lak chhoh zel tur leh mahni kutkea din chhuahna tura "Bana Kaih" ruahmanna a kalpui chhoh tur pawh a chhawrtu ni thei turin tun aṭanga theih tawp chhuah turin a fuih a ni.

Vawiina Lena Stadium-a BHSS Annual School Sports vawi 63-na hawnnaah hian Khuallian Pu V. Malsawmtluanga chuan India ram puanzar pawt pharhin, national anthem nen zahna lantir hmasak a ni a. Hemi hnu hian BHSS sikul puanzar pawt pharh lehin, school anthem nen zahna lantir a ni leh a. Contingent 9 - BHSS house hrang hrang palia junior section leh senior section ṭheuh leh Government High School (GHS) Lunglei pipe band te'n rimawi kal rem (march past) entira zahna chibai an buk chu Khuallian hian a chhang let nghal a. Hemi hnu hian GHS pipe band te'n rimawi tum chungin lam rem (band show) an entir bawk a. Sports item hrang hrang khelh chhunzawm nghal a ni.

BHSS-ah hian tun dinhmunah Class IX - XII-ah zirlai 950 vel an awm mek a. House pali (4) - Abraham, Daniel, David leh Moses house-ahte inṭhenin, tun ṭum annual school sports-ah hian September ni 23 - 27 inkar chhungin outdoor & indoor item chi hrang hrang 30 velah intihsiakna an buatsaih dawn a ni.

Attachment

  • Loading attachment...