2165/2024-2025

Dated Hnahthial, the 21st September, 2024: Vawiin khan Hnahthial DC Conference hall-ah SDO Sadar, Pi Esther Leihang kaihhruaiin Hnahthial District Disaster Management Authority hnuaia Quick Response Team Training chu kharna hun hman a ni a. He hunah hian Addl SP, Pu Beimosia Lapi hnen atang thusawi tawi ngaihthlak niin Project Director, Pu Malsawmtluanga Fanchun chuan valedictory speech a pe a ni.

Addl SP chuan Hnahthial hmasawnna leh mipuite thlamuanna tur ni bawk, Quick Response Team tana training buatsaih theih a ni chu lawmawm a tih thu a sawi a. Mizoram pum ang pawn tun hnaiah chhiatna thleng a tam thu sawiin chutiang chhiatna Hnahthialah a lo thlen palh pawha  inralring reng tur, khua leh tui tana pasaltha an ni tih in hre turin trainees kal khawm ho chu a chah a. Trainees ho chu chhiatna rawn thlen huna kan hmachhawp ber turte an ni tih inhre reng chungin an training chinah duhtawk mai lo tur leh inzir belh zel tura a duh thu a sawi bawk. Hnahthial District tan an training thiamna te chu hmang chhuak turin leh an thiamna te midang zirtir chhawng zel turin a chah bawk a ni.

Project Director, Pu Malsawmtluanga Fanchun chuan valedictory speech neiin he training hi Hnahthial tan bung thar kaina a nih thu a sawi a. Tlawmngai pawl atanga training rawn pe ho hnenah lawmthu sawiin an inpek tawhna zawng zawng avangin lawmthu a sawi bawk a. Rikrum thil leh chhiat tawhnaah a thawk chhuak hmasa ber pawl an nih thinna chu fakawm a tih thu sawiin chutih rual chuan thiamna nei chung ngei a chet chhuah chu mi tan a tangkai zawk mai bakah midang tan a thlamuanthlak a ni a ti a. Hetiang QRT training dawng, tlawmngai pawl, rikrum thil a thawk chhuak hmasa ber pawl ni thin hi ram dangah an awm meuh loh thu sawiin trainees ho chu kan hnam ziarang ropui tak chawi nungtu an ni tih inhre tura a duh thu a sawi a. Khuarel chhiatna leh chhiatna dang rawn thlengah pawh a thawk chhuak hmasa ber pawl leh midang puitu tha tak ni zel turin trainees ho chu a sawm a ni.

Trianees hnen atang feedback ngaihthlak a nih hnuin DIPRO, Pu F. Lalrinfela chuan vote of thanks pein he hun hi khar a ni. District Organiser, DM&R, Pu Zothansanga Hmar leh Pu Moses Lalthanpuia, State Adventure Organiser, SYS te he hunah hian an tel bawk a ni.

Training hi September ni 17 atanga neih tan niin ni nga a awh a. Crowd control, Psychological First Aid, Rope rescue knots, Rapid Ascent and descent, Assisted Rescue Method, Cliff rescue dan chi hrang hrang , Rigging and hauling system Alpine clutch, English reeve line leh Group rescue te he training-na ah hian zir a ni. 

Trainees tur atan Hnahthial Town YMA branch tin atang mi pahnih (2) theuh bakah YMA sub division atang mi pahnih(2) thlan chhuah an ni.