2152/2024-2025

2024 Mimkut thla ni 20: Vawiin khan Civil Hospital Lunglei chuan India rama damdawi in ṭha tehnaa certificate chi thum - National Quality Assurance Standards (NQAS), LaQshya leh MusQan an hmuh lawmna chu CHL Doctor's Seminar Hall-ah an buatsaih a, Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan Khuallian niin a hmanpui.

Pu V. Malsawmtluanga chuan Civil Hospital Lungleiin India rama damdawi in ṭha tehnaa certification pawimawh tak tak pathum a dawng thei chu thawktute thawh rimna rah a ni tiin, thawktute a chhuangin a lawmpui tak zet tih a sawi a. CHL chu Lunglei District chauh ni lo, chhim lam district zawng zawng aṭanga damna duha mipuite tluk luhna a nih angin an hlawhtlinna chu chhim lam pum pui tana hlawhtlinna nia a hriat thu a sawi a. Sawrkarin hriselna kawngah theih tawpin hma a la chho mek tih sawiin, Lunglei District-ah pawh MLA-te leh LMC lamin hriselna ruhrel tichangtlung turin pheikhai rual takin theih tawp an chhuah dawn tih a sawi a. CHL-a thawktu zawng zawngte chu thinlungah damna a awm tih hria a, an taksa natna enkawl dam piah lamah damlote dawr leh dawnsawn danah an rilru damna thlentu nih tum tlat turin a chah a. CHL quality certification lawmpui nan HPC Fund chhuak hmasa ber aṭangin Blood Bank thuam ṭhat nan cheng nuai khat pek an nih tur thu a puang nghal a ni.

He hun hi DHME Additional Director Dr SR Ngurchamliana pawhin hmanpuiin, CHL-in certification neih har tak tak pathum a ruala an dawng chu ropui a tih thu a sawi a. Certification chu kum thum chhung a nung dawn tih sawiin, kum danga hmu leh zel turin ṭan mar pat a ngai dawn a ni, a ti a. A thu leh lehkhaa kawl mai duh tawk lo va, damlote enkawlna leh an hna thawhah hospital ṭha nihna chu lantir zel turin leh hmasawn zel tum turin thawktute chu a chah a ni.

He hun hi Lunglei Additional Deputy Commissioner Pu James Miahlung chuan a kaihruai a. CHL hlawhtlinna chu Lunglei District chawimawitu a ni tiin, district mipuite ai awhin lawm thu a sawi a. CHL Chaplain Rev. Lalzuitluanga'n hunserh hmangin, CHL Senior Medical Superintendent Dr Laldinmawii'n inlawmna thu a sawi a. District Hospital Quality Manager Pi Lalchhanmawii'n national quality certification hmu tura an hma lak dan report pein, LMC Chairman Pu Lalzuithanga bakah lawmpuitu mi hrang hrangin thu an sawi a. Nursing School Lungleia zirlaite aṭangin lam leh CHL-a thawktute aṭangin zai ngaihthlak a ni a. Senior Specialist Dr C. Lalnunsangi'n lawm thu sawiin hun a khar a. Quality certification lawmna chawhlui kil ho zui a ni.

Civil Hospital Lunglei hian June ni 15, 2024 khan  Sawrkar Laipui Ministry of Health & Family Welfare aṭangin damdawi in inrelbawlna, hmanrua leh thawktute theihna, thiamna leh hna thawh danphunga tehfung hrang hrang 369 hmanga India rama hospital ṭha bik tehna, National Quality Assurance Standards (NQAS) certification hi hmuin, certification dang pahnih - MusQan (naupang lam enkawlna ṭha bik) leh LaQshya (nau neihna hmun ṭha bik) certificate a dawng tel bawk a. Northeast India bikah Civil Hospital Aizawl nen a ruala heti ang certificate pathum hi dawng thei hmasa ber an ni a. NQAS-ah 93.9%, MusQan-ah 94% leh LaQshya-ah 96.13% te hmuin, Mizorama certification hmu zingah point hmu sang ber an ni bawk.