2151/2024-2025

Dated: Mamit the 20th of September, 2024 : Vawiin khan Govt Mamit College-ah Mizo Zirlai Pawl, Mamit huaihawtin Zirlai titha chawimawina hun hman a ni a. Pu Jacob Lalawmpuia, District Bawrhsap chuan khuallian niin hun a hmanpui.

He hun hmanpuitu Pu Jacob Lalawmpuia chuan zirlai titha chawimawi phu, chawimawina chang hria a, hun buatsaihtu MZP hruaitute chungah lawmthu a sawi a, MZP hruaitu hna chu mahni intihlar nan mai nilo, zirlaite hmakhua ngaia an khaw thlir tidiktu ni thei tur a hma la zel turin a chah a, tunlaiah thalaite min eichhetu, kan ram kan district hmelma ruihhlo leh a kaihnawih laka fihlim thalaite ni turin a chah bawk. Tunlaiah kan thalaite rilru suk thlek diklo, changkanna leh hmasawnna hmang thiamlo kan tam ta em em a, Bible-in min chah ang leh awm tura min duh angin thalaite chu nuamsa taka awm tur nilo-in engkima fimkhur a hreawm tuara nun hmang tur leh nu leh pate zahna chang hria thalaite ni turin a fuih a ni. 

Khualzahawm Pu K. Lalnunfela, DEO/DPC, Mamit District pawhin thusawiin nihna leh dinhmun sang hi vawilehkhata neih theih a ni lo a, engtiklai maha inthlahdahlo a taima taka thawk a, dik taka hun hmang te'n hlawhtlinna tluantling an neih thin avangin zirlai kalkhawmte chu hlawhtlinna tha zawk chang zel tura hmalam pan zel turin a chah. 

Vawiina zirlai titha chawimawite hi garaduate leh Post Graduate niin Graduate Distinction 4, Top ten - 4 leh Topper- 1 an vaiin mi 9 chawimawi an ni a. Post Graduate - 5, top ten - 3 an vaiin mi 8 chawimawi an ni bawk. Kumin vek hian MZP Mamit buatsaih hian HSLC leh HSSLC zirlai titha chawimawina lo neih a ni tawh bawk.

Zirlai titha chawimawina hun hi Pu Lalthansanga, President, MZP Hqrs. Mamit chuan kaihruaiin, Dr. Lalrintluangi, Medical Officer hovin ruihhlo do awareness zirlai kalkhawmte nen hian hman ho a ni bawk a ni.