2150-2024-2025

Aizawl, the 20th September, 2024: Vawiin khan State Hub for Empowerment of Women (SHFW), Women & Child Development (WCD) leh Mizoram State Legal Services Authority (MSLSA) te tangkawp buatsaihin Taxation Auditorium, MINECO-ah in chhung khura hmeichhiate chunga tharum thawhna venna dan 'Protection of Women from Domestic Violence Act, 2005' chungchang zirhona training neih a ni. He hunah hian Justice Nelson Sailo, Judge, Gauhati High Court & Chairman, High Court Legal Services Committee chu khuallian niin training hi a hawng a. Pi Helen Dawngliani, District & Sessions Judge, Aizawl Judicial District & Chairperson, DLSA, Aizawl Judicial District chu khualzahawm a ni.

Khuallian nia he hun hmanpuitu Justice Nelson Sailo chuan India Danpuiin hmeichhiate dikna leh chanvo ngaihpawimawha a humhalh tlat thu sawiin, hmeichhiate chunga hleihlenna thleng thin chungchang a ngai thutak hle a, IPC thlaktu dan thar Bharatiya Nyaya Sanhita (BNS) ah pawh a ngaihpawimawh zia chiang taka a tarlan thu a sawi bawk.

Khualzahawm Pi Helen Dawngliani chuan mipa leh hmeichhiate inkara inthliarhranna awm nasatnaah hmeichhiate tihduhdahna a thlen thin thu sawiin, mipa leh hmeichhiate inthliarhranna awmlo tura tangrual a tul thu a sawi a ni.

He hun hi Pi Lalrochami Ralte, CJM Aizawl & Secretary, Aizawl DLSA ni bawk chuan kaihruaiin kalkhawmte lawmna thu a sawi a. Pi Zoramthangi Chhangte, Director, Women & Child Development chuan Women and Child Development hmalakna, kalphung leh chona hmachhawn hrang hrangte a sawi a. Pi Gracy L. Bawitlung, Member Secretary, Mizoram State Legal Services Authority-in lawmthu sawiin hawnna hun hman hi a khar a ni.

Hemi hnu hian technical session neih niin, Dr. HTC Lalrinchhana, Registrar, Gauhati High Court,  Aizawl Bench chuan Protection of Women from Domestic Violence Act, 2005 chungchanga hriattur pawimawhte leh a kaihhnawih hrang hrangte mawhphurhna chungchang a zirtir a. Pi Sylvie Zomuanpuii Ralte, Addl. District & Sessions Judge, Aizawlin in chhung khura hmeichhiate chunga hleilenna thleng avanga Court-in thubuai a chinfel tawh chhinchhiah tlak tak takte sawizauin hetiang thubuai a thlen thulha chetlak dan tur leh hmalak chhunzawm zel dan turte a zirtir bawk a. Zawhna leh chhanna hun hlawkthlak tak hman a ni.