1569/2024-2025

2024 Thlazing ni 13: Lunglei High Powered Committee (HPC) Vice Chairman Pu V. Malsawmtluanga, MLA chuan August ni 2 aṭanga ni 7, 2024 chhung khan Delhi-ah India sawrkar mi pawimawh tak tak, Pu Armstrong Pame IAS, Director, Ministry of Information and Broadcasting; Pi Lal Ramdinpuii Renthlei IES, Joint Director, Ministry of Consumer Affairs, Food and Public Distribution; Pu T. Roumuan Paite IRS, Chairman-cum-Managing Director, NSTFDC (National Scheduled Tribes Finance and Development Corporation) & Managing Director, TRIFED (Tribal Co-operative Marketing Development Federation of India Limited); Pu B. Vanlalvawna IFS, Joint Secretary, Ministry of External Affairs leh Pu Puneet Rastogi IPS, Additional Director General, Border Security Force te chu a kawm a, Mizoram tana thil pawimawh hrang hrang a sawipui a ni.

Pu V. Malsawmtluanga chuan Pu Armstrong Pame nen an inkawmnaah hian Mizoram hmasawnna tur a ngaih pawimawh hrang hrang a sawipui a. Pu Armstrong Pame chuan Mizoram district thlan bik panga te tan private company hmangin Movie Theatre/Cinema Hall an rawn sak theih tur thu leh chumi sak ṭan nan a hmunhma, tui leh power supply te District Administration-in an lo buatsaih lawk theih nan ₹ nuai 30 ṭheuh an lo pek lawk tur thu a sawi a ni.

Pi Lal Ramdinpuii Renthlei nen an inkawmnaah hian Mizoram hmasawnna tur thil hrang hrang sawi dunin, Pu V. Malsawmtluanga chuan Mizoram tan sum a tam thei ang ber hnuk lut turin dawhthleng an lo buatsaih tur thu a hrilh a. Pi Lal Ramdinpuii Renthlei hi Lunglei HPC Adviser atan a sawm nghal a; ani pawhin harsatna a awm a nih loh chuan HPC Vice Chairman sawmna hi tihhlawhtlin ngei a tum thu a sawi a ni.

TRIFED Managing Director Office, Okhla, New Delhi-ah HPC Vice Chairman Pu V. Malsawmtluanga chu Pu T. Romuan Paite, MD leh Lt Col. Sanyam Kashyap, General Manager te'n lo dawngsawngin, inkawmna hun ṭha tak an hmang a. TRIFED-in Mizoram hmun hrang hranga hna an lo thawh tawh dan leh hna thawh zel an tum thu te lo hrilhin, National Cooperative Development Corporation nen thawk dunin Mizoram Rural Bank kal tlangin mimal, society leh self help group te loan ṭha chi an puktir dan leh puk theih dan te, Mizoram bikah cheng vaibelchhe 50 vel zet loan a tih theih dawn thu te an lo hrilh a. Promoting Tribal Products Scheme kal tlangin Mizo kut themthiamte deh chhuah an leisak theih thu leh chu'ng thilte chu Tribes India Store-ah an zawrh chhawn leh ṭhin thu sawiin, Mizoram sawrkarin dawr pakhat an lo ngaihtuah theih chuan Tribes India Store hi Aizawlah rawn hawn ngei an duh thu an sawi a. An thil thar chhuahte TRIFED kal tlanga hralh turin District Administration kal tlanga inziak lut (empanelment ti) turin kut hna thawkte an chah bawk a ni.

Pu V. Malsawmtluanga chuan Pu B. Vanlalvawna nen hian Pu B. Vanlalvawna office chamber, South Block, New Delhi-ah inkawmna hun ṭha tak hmangin, Pu B. Vanlalvawna chu Mizo officer rinawm leh hming ṭha, tun hma aṭang tawha Mizote tihming ṭhatu a nih avangin chhuanawm a tih thu a sawi a. Pu B. Vanlalvawna pawhin Mizo/India mi ram pawna hna thawk/cheng mekte'n harsatna an neih changin Ministry/Embassy kal tlanga an puih ṭhin thu sawiin, Mizo/India mi ram danga harsatna tawk reng reng an ṭanpui theih reng thu a sawi a ni.

Pu V. Malsawmtluanga chu Pu Puneet Rastogi IPS, Additional Director General, Border Security Force nen inkawm bawkin, Mizoram chhunga BSF hna thawh dan te an sawi dun a. Pu V. Malsawmtluanga chuan a bik takin Lunglei District chhunga an duty-na hmunah BSF chuan mipuite nen inlaichinna ṭha zawk siam zel tur te, khawtlang tana Civic Action Programme kal tlanga nasa zawka mipuite tana rawngbawl tur te'n a ngen a. Mizo/hnam bil battalion din theih ni tawh lo mah se, Mizoramah BSF battalion pali lai a awm avangin BSF-a ṭang Mizo sipaite chu battalion palia sem darh theih vek an nih thu te hrilhin, Mizo sipaite Mizorama posting pe hram hram turin a ngen a, chu chuan ṭawng inhriat tawn loh vanga buaina leh harsat tam tak a chin fel theih nghal tur thu a hrilh a ni.