1568/2024-2025

Champhai, 13th August, 2024: Vawiin khan Champhai Bawrhsap, District Election Officer ni bawk Pu VL Remliana chuan Khuangthing, Leisenzo, New Champhai, Ngur leh Thekpui Village Council By-Election neih tura hman tur Final Electoral Roll chu DC Conference Hall, Keifangtlangah a tlangzarh.

Champhai Bawrhsap Pu VL Remliana chuan he huna kalkhawm political party, MJA leh tlawmngai pawl aiawhte hnenah lawmthu a sawi a. Electoral Roll felfai leh hrisel a awm theih nan sawrkar, political party, khawtlang hruaitute leh tlawmngai pawl ten thawhhona tha an neih a ngaih thu a sawi bawk. 

He hunah hian Electoral Registration Officer, Addl DC ni bawk Pu K. Zorammuana pawhin thu sawiin Electoral Roll a luh diltu ten form uluk taka an fill-up a tul tih a sawi a. He mi kawngah hian BLO,  khawtlang hruaitute leh political party te thawhpuina a ngen a ni. 

Pu Benjamin Zalawma Ralte, Election Officer in a tarlan danin Champhai District-a Village Council panga - Khuangthing, Leisenzo, New Champhai, Ngur leh Thekpui ah VC By-Election hi neih tur a ni a. Ngur (member 5) Thekpui (member 3) khuaah te hian member zawng zawng thlan that a ngai dawn a, Khuangthing, Leisenzo leh New Champhaiah te hian member 1 theuh thlan that tur a ni thung. Final Electoral Roll tlangzarh a nih takah chuan State Election Commission in inthlan vel leh By-Election hi neih a ni dawn a ni.

Draft Electoral Roll hi ECI Roll 2022 behchhan a siam niin, July ni 24, 2024 khan tlangzarh a ni a. July ni 25 atanga July ni 31 chhung khan inziaklut duh leh sawisel duh nei tan hun hawn niin, heng a dilna lut te hi August ni 1-8 chhung khan ngaihtuah a ni a. Vawiinah Final Electoral Roll tihchhuah a lo ni ta a ni.

Khuangthingah hian Draft Electoral Roll-ah voter 1083 (mipa 546 leh hmeichhia 527) an awm a, Final Roll ah hian voter 1063 (mipa 535 leh hmeichhia 528) awmin, voter 20 (-1.85%) in an kiam a ni. Leisenzoah hian Draft Roll-ah voter 597 (mipa 309 leh hmeichhia 288) an awm a, Final Roll-ah  hian voter 610 (mipa 317 leh hmeichhia 293) awmin, voter 12 (2.18%) in an pung a ni. New Champhaiah hian Draft Roll-ah voter 968 (mipa 512 leh hmeichhia 456) an awm a, Final Roll-ah hian voter 983 (mipa 460 leh hmeichhia 523) awmin, voter 15 (1.55%) in an pung a ni. Ngurah hian Draft Roll-ah voter 1035(mipa 498 leh hmeichhia 537) an awm a, final roll-ah voter 1091 (mipa 530 leh hmeichhia 561) awmin, voter 56 (5.41%) in an pung a ni. Thekpuiah hian Draft Roll-ah voter 227 (mipa 125 leh hmeichhia 102) an  awm a, final roll-ah voter 244 ( mipa  133 leh hmeichhia 111) awmin, voter hi 17 (7.49%) in an pung a ni.

Vawiin Roll tlangzarhnaah hian sawrkar official-te bakah Political Party, tlawmngai pawl leh MJA aiawhte an tel.

vc roll status.pdf

final roll a publish a sem tur.pdf