1567/2024-2025

Aizawl, the 13th August, 2024: Social Welfare & Tribal Affairs, Women & Child Development Department hnuaia State Tribal Resource & Training Centre (STRTC) buatsaihin vawiin khan State Tribal Welfare & Development Policy chungchang inhrilhhriatna leh inrawnkhawmna hun, ‘Orientation cum Consultation Workshop on State Tribal Welfare & Development Policy, Mizoram' chu Aijal Club-ah neih a ni a. He hun hi an Chairperson Pi Lalrinpuii, Social Welfare & Tribal Affairs, Women & Child Development Minister chuan a hmanpui a ni.

Pi Lalrinpuii chuan ruahman lawk anga a vawikhat nan leh Mizote tana bung thar ni tura Mizoram bik tana Tribal Policy hmawr bawk fel a ni tur chu lawmawm a tih thu sawiin, hei hian State Tribal Resource & Training Centre tana hmalakna turah hmasawnna duhawm tak a thlen ngei a beisei thu a sawi a. Sawm bik mi pawimawh te'n he hun an rawn ngaipawimawh chu lawmawm a tih thu sawiin, Tribal-te hamthatna leh hmasawnna kawng dap kawnga inhrilhhriatna leh inrawnkhawmna buatsaih chu ram hmasawnna leh Department hmalakna atan a tangkai dawn tih a sawi bawk.

Thusawitu dang Pi Lalzarmawii, IAS, Commissioner & Secretary, Social Welfare & Tribal Affairs, Women & Child Development Department chuan policy chhungah ruahmanna fing tak zeh a nih thu a sawi a. Tribal Affairs lama State hmalakna thuam chak turin UNDP in Staff 4 an rawn pek tur thu leh interview buatsaiha tunkar chhunga lak fel mai tur an nih thu a sawi bawk.

He hunah hian State Tribal Resource & Training Centre-in State Tribal Policy an lo duan chhin leh mithiam engengemawzat tena an lo chai tawh khaikhawmna tlangpui chu STRTC Director Dr. Lalhriatzuali Ralte, IAS, Social Welfare & Tribal Affairs Director ni bawk chuan PowerPoint Presentation hmangin a sawifiah a. India rama Tribal-te hmasawnna kalpui a nih dante tarlangin, Sorkar laipuiin India ram danpui hmangin policy leh guideline chi hrang hrang siam tawh mah se, mumal leh awmze nei zawka Mizoram hmathlir 2047 ruahmanna neih a tul avangin State Tribal Policy hranpa nei tura hmalak chhoh a ni, a ti a. He policy leh Sorkar laipui hmalakna ‘Support to TRI’ tih scheme hnuaia nasa taka hmalak a nih tawh dante leh State Tribal Resource & Training Centre thuam chak mek a nih dante a tarlang bawk.

Vawiin hun hmanah hian Sorkar Department hrang hrang hotute, Civil Society Organization, Tlawmngai pawl, Social Welfare Department-a lo thawk tawhte, IAS Association (Mizoram) aiawhte, Mizoram chhunga hnam chi hrang hrang aiawhte leh Chanchinbumite an tel a ni.