1566/2024-2025

AIZAWL; the 13th August, 2024: Vawiin chawhma dar 11:00 khan Mizoram Larsap Dr. Hari Babu Kambhampati chuan NIELIT(National Institute of Electronics and Information Technology), Zuangtui,Aizawl a tlawh a. NIELET Director Dr.T.Gunendra Singh, a thawhpui te leh zirlai naupang ten an lo dawngsawng a. Larsap hian NIELIT building leh hmunhma te fangin, Cybersecurity Laboratory, Electronics Laboratory leh IT Laboratory te a tlawh bawk.

Larsap lo chawnglawmna programme hi NIELIT Seminar Hall-ah neih a ni a. Hetah hian Pu C.Zonunsanga, Scientist 'C' chuan power point presentation hmangin NIELIT dinhmun, an hmalak tawhna leh hmachhawp te entirna hun a hmang a. Faculty aiawh leh zirlai te atangin thusawina hun an hmang bawk.

Vawiin NIELIT a tlawhna-ah thu sawiin, Larsap chuan NIELIT hi thangkhat lian vel chauhva upa ala ni nâ-in, mi sang tam takin NIELIT hi an chhawr tangkai tawh a, tunah Lunglei NIELIT Extension Centre pawh bunfel tawh a nih thu ka hriat hian min ti lawm hle a ni, a ti.

Larsap chuan IT khawvelah kan chen tawh avangin Hon'ble PM Pu Narendra Modi Kaihhruai sawrkar laipui pawhin Digital India campaign duangchhuakin, ngawrh takin a kalpui mek a. Kum 2047 ral hma ngeia India ram chu ram hmasawn leh changkang (Viksit Bharat) nih tir hi Kan Prime Minister thiltum ber pakhat a ni.

Ram hmasawn leh changkang ni tur erawh chuan mitin hi digitally literate kan ni phawt a ngai a ni tiin, Larsap chuan Chungtiang thilah chuan NIELIT hian mawhphurhna lian tak a nei a ni, a ti. Heng health, education leh agriculture-ah te hian Digital Technology hian hmasawnna nasa takin a thlen mek a.Digital technology chuan Telemedicine hmangin hmun kilkhawr tak takah pawh quality healthcare thlen tir ve mek a ni.

Kan Education-a IT leh Electronics tangkaizia te, Covid hripui lenlai a tangkaizia hmutu vek kan ni.
IT leh Electronics in hmasawnna kan rama a lo thlen hi, mitin te banphaka dah hi kan tum tlat tur a ni, tiin Larsap chuan IT leh Electronics in hmasawnna a thlenrualin, pawikhawihna(Cyber Crime) tam tak a thlen ve mek a.Chung harsatna sukiang tur chuan NIELIT in CyberSecurity lam a buaipui mek tih ka lo hria a, ka lawm hle bawk ni.

NIELIT hian hmasawn zel u la, Mizoram ram leh India ram chu Viksit Mizoram leh Viksit Bharat a ni theih nana thawktu pawimawh ber te zing a mi ni turin duhsakna ka hlan a che u, Larsap chuan a ti.

Vawiin NIELIT a tlawh hriatreng nan Larsap hian Thingtiak(Lenhmui tiak) NIELIT kawtah a phun nghal a ni.

Vawiin NIELIT a tlawhna-ah hian NIELIT thuneitu  te chuan  Artificial Intelligent(AI) Laboratory din chungchang te,NIELIT chu Deem University a pawm mai tur a ni tawh avanga Ram an mamawh belh chungchang te,LDC hna dil nana NSQF alaigned Certificate  pawm sak ve tura an duhna te Larsap hnenah hian an lo thlen a. Larsap pawhin lo bawhzui a tum thu a hrilh hlawm bawk.