1151/2024-2025

2024 Vawkhniahzawn thla ni 11: Vawiin khan District Institute of Education and Training (DIET), Lunglei chuan an kum 50-na (Golden Jubilee) chu DIET Auditorium-ah an lawm a. He hunah hian Lunglei High Powered Committee (HPC) Vice Chairman Pu V. Malsawmtluanga chu khuallian niin, Mizoram State Council of Educational Research and Training (SCERT) Joint Director Pi Caroline Zoramthangi chu khual zahawm a ni.

Khuallian, Lunglei HPC Vice Chairman Pu V. Malsawmtluanga chuan DIET Lungleiin tluang taka golden jubilee kum an thleng thei chu a lawmpui thu leh bialtu MLA pur buai lova a lawmna an buatsaih thei chu chhuanawm leh changkang a tih thu sawiin, HPC fund chhuak leh hmasaah DIET Lungleiin an mamawh eng emaw tak tihsak an tum tur thu a sawi a. DIET Lungleiah computer operator hna a lo thawh ve tawh thu leh Master of Physical Education (M.P.Ed) zir tura fuihna a dawnna leh thu tlukna a siamna hmun a nih thu te sawiin, tun dinhmun a thlen theih nan DIET Lunglei chu a hringnuna mellung pawimawh tak pakhat a nih avangin a ngaihlu hle, tih a sawi.

Pu V. Malsawmtluanga chuan Mizoram sawrkarin kum 2024-2025 hi 'insawh ngheh kum' (year of consolidation)-ah puangin, a theih ang anga inrenchem tura hma lak a ni a, chumi zarah chuan sawrkar pawhin sum khawlin, tun hnaiah casual teacher pawh eng emaw zat lak theih phah a ni, a ti a. April 2024-ah GST-a Mizoram sawrkarin sum a hmuh 52%-a pung chhovin, India ramah a sang ber kan ni a, state sum leh pai dinhmun pawhin hma a sawn zel a ni tiin, zirtirtu indaih lohna a la nasat avangin a ṭul angin zirtirtu pawh lak belh zel tum a ni, a ti a. Zirna kawngah Mizoram tan hmathlir zau tak an neih thu sawiin, zirtirtu lak leh dah ngheh kawngah pawh kalphung felfai tak ruahman a nih thu te, zirtirtute pawh rualkhai taka an thawhna hmun siam tum a nih thu te a sawi a; thuneitute hnena duhsak zawng insawipui a awm loh nan mipuite ṭawiawmna leh venpuina an mamawh dawn hle tih a sawi.

Khuallian chuan zirna chu ram hmasawnna lungphum lian tak a nih thu sawiin, zirna ṭha nei turin zirtirtute an pawimawh hle tih a sawi a. Zirtirtute chu zirna in chhungah mai ni lo, pawn lama an nun dan chenin zirlaite tana entawn tlaka an nun a ṭul thu leh sikul hlim siam turin zirtirtute an hlim a ṭul thu sawiin, 'thawh rimna zawng zawngah hlawkna a awm' tih leh 'hlawhtlinna bul ṭanna chu thu awihna a ni' tih chu zirlaite hnenah zirtir ṭhin turin zirtirtu ni tura inzir mekte chu a chah a ni.

Khual zahawm, SCERT Joint Director Pi Caroline Zoramthangi chuan zirtirtu ni tura zirna (teacher education) chu missionary hmasate'n ngai pawimawhin, bul min ṭansak tih sawiin, Mizorama teacher education lo ṭhan chhoh dan chu ngaihnawm taka sawi tham a nih thu a sawi a. DIET Lungleiin kum 50 hmel an hmu chu a lawmpui thu sawiin, SCERT pawhin Principal leh thawktute inpekna leh thawh rimna chu an ngaihlu hle tih a sawi a. 'Khawvel ram tin changkanna chu zirtirtute kut hnu a ni' an lo tih ṭhin hian zirtirtute pawimawhna a tar lang chiang hle tih sawiin, zirtirtute leh zirtirtu ni tura inzir mekte chu zirna ṭha leh tluantling ramtiam thlir chung zela theih tawpa ṭang ho turin a sawm a ni.

DIET Lunglei Golden Jubilee lawmna pual hian zing dar 10-ah jubilee dar vuak a ni a. Hemi hnu hian DIET Lunglei complex-a kum 50 tlin hriat rengna lungphun chu khuallianin hawngin, khual zahawmin golden jubilee balloon a thlawh chhuahtir a. DIET Auditorium-ah golden jubilee lawmna hun hman chhunzawm niin, DIET Choir te'n hun hawn nan DIET Lunglei hla, 'Bona Thim Tieng Turin' tih hla an rem a. DIET Lunglei Principal Pi V. Lalliansangi'n inlawmna thu sawiin, thawktu hlui leh thawk mekte hmelhriattirna hun a hmang a. Baptist Church of Mizoram (BCM) Serkawn bialtu pastor Rev. Jc. Vanlalluaia'n hunserh hmangin, Golden Jubilee Celebration Committee Secretary Pi Laldinthari Ralte chuan report a pe a. Souvenir Sub-Committee huaihawtin khuallian leh khual zahawmte hnenah lawm thu sawina thuziak leh DIET Lungleia thawktu hluite hnenah chawimawina thuziak hlan niin, hun hmanpuitute aṭangin jubilee lawmpuina thilpek hlanna hun hman a ni bawk a. Zaithiamte zai ngaihthlak niin, Golden Jubilee Celebration Committee Chairman Pu HP Lalremtluanga'n lawm thu a sawi a. DIET Choir-in 'Aw Nang, Kan Lal, Kan Pathian' tih hla remin chawhma hun an khar a ni.

Chawhnu lamah DIET Lungleia thawktu hluite leh zirlai hluite aṭangin DIET Lungleia an sulhnute thlir letna hun hman niin, house band leh malzai zai te ngaihthlak a ni a. Tlaiah golden jubilee lawmna ruai kil ho niin, zan lamah golden jubilee celebration concert buatsaih a ni bawk.

DIET Lunglei Golden Jubilee lawmna hunah hian Lunglei Municipal Council (LMC) Chairman Pu Lalzuithanga, Vice Chairman Pu K. Lalrinawma, Executive Councillor Pu Zorinsanga Hmar leh DIET Lungleia thawktu leh zirlaite bakah, sawrkar official-te, DIET Lungleia thawktu hlui leh zirlai hluite, VC, NGO, MJA leh sawm bik mi eng emaw zat an tel a ni.

DIET Lunglei hi kum 1974 September ni 28 khan "Under Graduate Teachers' Training Institute" (UGTTI) tih hming pu-a din a ni a. Kum 1980 July ni 4-ah "Teacher Training Institute" (TTI) tia a hming thlak niin, kum 1993 February ni 4-ah "District Institute of Education and Training" (DIET) tia thlaka tihlen a lo ni leh ta a ni. Kum 1975-2023 chhungin Diploma in Teacher Education (D.T.Ed), Diploma in Education (D.Ed), Diploma in Elementary Education (D.El.Ed) leh Work Education (WE)-ah te zirlai (candidate) 4,406 awmin, zirlai 4,419-in an zir chhuak (pass) a. Kum 2020-2023 chhungin Bachelor of Education (B.Ed) zirlai 191 zinga 186-in an zir chhuak bawk.

DIET Lungleiah hian a din tirh (1974) aṭanga June 2024 thlengin pension leh transfer-a chhuak Principal 14, teaching staff 59, leh non-teaching staff 43, an vaiin mi 116 an awm tawh a. Tun dinhmunah thawktu 30 (teaching staff 15 leh non-teaching staff 15) an awm mek a. D.El.Ed-ah seat 100 (unit 2) leh B.Ed-ah seat 50 (unit 1) an nei mek a ni.

DIET Lunglei hian golden jubilee pual hian budget ₹ nuai 11.14 ruahmanin, a remchan dan ang angin sum an tuak a. Golden jubilee pualin kum 2024 kum tir lam khan TNT Home, Lungleiah charity ride buatsaihin, ṭanpuina pawisa fai ₹ 15,550/- leh thawmhnaw leh ei tur eng emaw zat an hlan a. Khawlai tihfai hnatlang ṭum eng emaw zat an thawk bawk a ni.