1150/2024-2025

Mamit 11th July, 2024 : Vawiin khan Taitesena Buk, DC Office-ah Pu M.Keivom, Director, Ministry of External    Affairs, Gov't of India hovin Aspirational District, Mamit hmasawnna hna kal mekte thlirho-in a kaihnawih Department-te nen thutkhawm a ni.

Pu M.Keivom chuan India Sawrkar hnuaia hna a thawhna kawngah a tawn hriat hrang hrangte sawiin, Mamit District chhunga hmasawnna hna hrang hrang a nihna tur ang taka thawk tur leh Aspirational District kan nihna atanga khaichhuah kan nih theih nan theihtawpchhuah turin Officials-te a chah a, ADP hnuaia project hmalakna hrang hrangah a chhawr tangkaitu turte hnen atanga thurawn lak a pawimawh thu leh project siam tute tan tunlai hmasawnna mil a training neih that a tul thu a sawi bawk.

Pu V.L. Remliana, District Bawrhsap pawhin Mamit District dinhmun tlangpui  sawiin, District-in hma a sawn zelna tura tanrualna tur hrang hrangte a tarlang bawk.

Pi Grace Lalremdiki, SDC, Mamit chuan Aspirational District, Mamit-in District hnufual chawikanna atana hmasawnna hna kal mek leh zawh tawhte, hmabak la awmte a lem nen a tarlang a, Sawrkar laipui kaltlanga NITI Aayog atanga sum 19 crore hmuh a ni a, tunah hian 2 crore lokal mekin hei hi Nikum August, 2023-a Overall ranking-a pangana kan nih avanga Award baka a ken tel a ni. Mamit District hian tehna hrang hrangah pawh dinhmun duhawm tak tak a lo hauh tawh a, Pakhatna dinhmun bakah tehkhawng hnuhnung ber August, 2023 ah khan Overall-ah pangana dinhmun a hauh mek a ni.

Aspirational District, Mamit hnuaia Line Department hrang hrang te'n  an hna kal meka hlawhtlinna awmte leh hmachhawp leh harsatna an neihte an tarlang bawk a ni. 

India rama District hnufual chawikan tur Aspirational District Mamit a nihna anga hmasawnna in a thlenna tur Department hrang hrangah Sawrkar laipui kaltlanga hna kal mekah hian Health & Nutrition, Education, Agricultural & Water Resources, Financial Inclusion & Skill Development leh Basic Infrustructure-ah te hmalak a ni a, heng hmasawnna hna-ah hian rah duhawm tak tak hmuh chhoh mek a ni. 

Vawiin Meeting-ah hian Officials te bakah Aspirational District kaihhnawih Department te an tel a ni.

Vawiin vek hian Pu M.Keivom, Director, Ministry of External Affairs, Gov't of India hian District Hospital, Mamit, Anganwadi Centre - 9 leh Mamit College-te a tlawh a, naktuk hian Darlak leh Bawngva khua a Health & Wellness Centre leh Anganwadi Centre-te a tlawh bawk ang.