2523/2024-2025

2024 Khuangchawi thla ni 15: Vawiin khan Lunglei Auto Rickshaw Owners Association (LAOA) chuan kum 25 an tlin (silver jubilee) lawmna chu Saikuti Hall, Lungleiah an buatsaih a, Lunglei High Powered Committee (HPC) Vice Chairman Pu V. Malsawmtluanga MLA chuan Khuallian niin a hmanpui.

Lunglei HPC Vice Chairman Pu V. Malsawmtluanga chuan LAOA silver jubilee lungphum chu hawngin, LAOA member-te chu silver jubilee chibai a buk a. Lungleia auto ricksaw neitu leh khalhtute chu Lunglei khawpui hmel lanna an ni tih sawiin, mipui rawngbawlna tak tak hna vuantu, mipui nena innghenga hna thawk an nih angin an nunphung leh chezia avanga ram hmel tibaltu emaw, ram hmel timawitu emaw an ni thei tih vawng reng turin a chah a. An mi phurhte'n ruihhlo an lo pai chang emaw, anmahni ngei pawhin ruihhlo phur tura thlemna an tawh chang emaw a awm theih avangin, chuti ang lakah chuan invenga inthiar fihlim turin LAOA member-te chu a chah a. Anmahni dawrtuah tar leh upa, naupang zawkte leh hnam dangte an awm nawk ṭhin avangin tlawmngaihna, dikna leh rinawmna kawngah zo nun ze mawi lan chhuahtir zel tura chahin, chuan man chungchangah sawrkarin a tuk anga dik taka kalpui tur leh pawl hmel tibaltu ni lo tura fimkhur tur te'n a chah a ni.

Khuallian chuan sawrkarin ram intodelhna atan leh a taima leh a ngaihna hriate din chhuahna turin "Bana Kaih" ruahmanna a tlangzarh tih sawiin, LAOA member-te chu a chhawr ṭangkaitu ni tur leh mi dangte hnena puangzartu nih tum turin a chah a. He ruahmanna hi sawrkarin hlawhtling taka a kalpui theih nan mipuite thlawpna leh thawhpuina a pawimawh tih sawiin, an thlawpna a ngen a. Mipuite'n mahni awm hmun aṭanga mobile app kal tlanga lirthei hman tur an koh mai theih nana ruahmanna chu sawrkarin a bawhzui mek tih sawiin, a tak ram a channa turah ṭha taka sawrkar thawhpui turin LAOA member-te chu a chah a. LAOA silver jubilee lawmpui nan thilpek pawisa fai a hlan bawk.

He hun hi LAOA President Pu K. Lawmhmingthanga'n kaihruaiin, LAOA Adviser Pu PC Laldinthara'n hunserh a hmang a. LAOA Finance Secretary Pu Ngurlianzuala kaihhruaiin member chatuan ram pan tate sunna hun hman a ni a. Khuallian leh sawm bikte leh LAOA hruaitu lo ni tawhte'n jubilee dar vuain, LAOA General Secretary Pu K. Lalṭhakima hnen aṭangin secretary report ngaihthlak a ni a. Tourism Department Director Pi R. Lalrodingi leh District Transport Office Lungleia Enforcement Inspector Pu Lalthlamuana te bakah, LAOA Founder Vice President Pu F. Lalchhanhima, LAOA Vice President Pu Laldinpuia Sailo, All Mizoram Auto Rickshaw Owners Association (AMAROA) leh Lawngtlai Auto Rickshaw Owners Association (LAROA) ai awhte hnen aṭangin thu sawi ngaihthlak a ni bawk a. Silver Jubilee Celebration Committee Secretary Pu PC Vanlalchhuanvawra'n lawm thu sawiin hun a khar a. Silver jubilee lawmna chawhlui kil ho zui a ni.

LAOA hi October ni 15, 1999-ah mi 14 kal khawmin an din a ni a. Tun dinhmunah member 600 chuang awmin, LAOA hnuaiah hian stand welfare 17 a awm mek a ni.