2524/2024-2025

AIZAWL; the 15th October, 2024: Vawiin chawhma dar 9:30 atang khan Mizoram Assembly Conference Hall-ah “Capacity Building cum Sensitization Workshop on PM Gati Shakti of Mizoram” chu Bhaskaracharya National Institute of Space Applications and Geo-Informatics (BISAG-N) leh Ministry of Development of North Eastern Region (MDoNER) te bultumin  buatsaih a ni a. Gov't. of Mizoram hnuaia Department 40 aiawhte an tel a ni.

Pu Lalmalsawma Pachuau, Planning and Programme Implementation Department Secretary chuan workshop hawnna leh a chhimtute lawmna thu sawiin, hetiang workshop buatsaih a ni chu lawmawm a tih thu a sawi a. PM Gati Shakti  portal chu Mizorama department hrang hrang ten an hriatthiam tawk loh vanga an la chhawr tangkai tawk loh thu tarlangin, workshop neih zawh hunah chuan Geographic Information System (GIS) behchhanin project te kan siam tawh ang a, project insiamthuah palh leh diklo te a awm tawh dawn lo a ni, a ti.  Concept paper leh DPR te kenga Delhi kalpui thin te, e-mail leh Dâk hmanga thawn thin te, bawhzui ngai thin te chu online hmangin a tih theih vek tawh dawn a ni, a ti bawk.

Pu Vivek Gupta, Senior Director, (IT), MDoNER chuan PM Gati Shakti Portal chungchanga a pawimawh zual khuhhawnna (keynote address) neiin, PM Gati Shakti hnuaia hmalakna peng pakhat “Poorvottar Vikas setu” chu India hmarchhak state 8 te puala siam a ni a, vawiin workshop-a kan thlur bing tur hi a ni a. Hindi thumal Poorvottar Vikas Setu tih chu- Poorvottar-Hmarchhak, Vikas- hmasawnna, setu-Lei (Bridge) tina a ni a. A awmzia chu India hmarchhak state ten India ram state dang te ruala hmasawnna rahbi an tuk ve theih nana, Central sawrkar nena thlun zawmtu Lei  tihna a ni tiin,  Poorvottar Vikas Setu portal kaltlanga Project hrang hrang buaipui dan leh a kaihhnawih thil pawimawh hrang hrang te a tarlang a ni.

Vawiin workshop-ah hian Poorvottar Vikas Setu Portal hman dan te zir niin, MDoNER Gati Shakti Portal leh Single Mater Plan (SMP) portals live demonstration te neih  a ni a. Sawihona hun leh zawhna leh chhanna hun te hman a ni bawk.