2525/2024-2025

Kolasib Dated 15th October 2024 : Khawvel thiamna leh changkanna thangchho zelah Electronic Media leh Information Technology hman sualna chungchuanga inzirtirna hun 'Seminar on Cyber Crime' chu vawiin khan Kolasib Press Club-ah neih a ni a, Deputy Speaker Pu Lalfamkima chuan he hunah hian khuallian niin hun a hmanpui.

Vawiina 'Seminar on Cyber Crime' hmanna hi Mizroam Journalist Association (MJA), General Headquarters leh Mizoram Home Department hnuaia Mizoram Police-te buatsaih a ni a. Pu C. Lalhmachhuana Vice President, MJA, Gen. Hqrs chuan hun kaihruaiin, Pu Andrew V.L. Auva, President, MJA Kolasib District chuan kalkhawmte lawmna hun a hmang a. He hunah hian Khuallian Pu Lalfamkima chuan thusawina hun neiin, khawvel thiamna leh changkanna thangzel hian mihringte tan kawng tam takah hmasawnna a thlen lai hian sualna lamah pawh nasa takin kawng a hawn tel thu a sawi a. Thiamna leh hriatna chu mitin kutphaha hum theih mai a banphak awlsama a awm tawh avanigin mitinte'n Internet leh Mobile Phone-te hmandan thiam kan zir zel a pawimawh thu a sawi.

Deputy Speaker Pu Lalfamkima chuan Internet leh Mobile Phone-te hi sual tih nan leh misualte inbumtirna hmanruaa hmang lovin, tangkai zawka hman dan kan inzirtir pawh a tul hle a ni, a ti a. Inbumna leh dan lo va che thinte manchhuahna kawnga Mizoram Police-te hmalakna chu chhuanawm a tih thu a sawi bawk.

Pu Lura Hauzel, SP, Cyber Crime pawhin thu sawiin, Mizoram-ah Online hmanga sum inchhuhsakna, mipat hmeichhiatna hmanga intihmualphona, leh Social Media-a mimal tihmualphona thil hrang hrang a tam tawh hle a. Hemi lam buaipuitu Police-te chu an tlem thu leh Cyber Crime Case chu buaipui tur a tamin a pun chak thu a sawi a. Hemi kawnga an hmalakna ah MJA leh he huna kalkhawm tlawmngai pawl hrang hrangte chu thawhpuiah a sawm nghal bawk a ni.

Vawiin a 'Seminar on Cyber Crime' hmanna ah hian Inspector MS Dawngliana chuan Powerpoint Presentation hmangin kal khawmte hnênah Cyber Crime chungchangah zirtirna a pe a. Seminar on Cyber Crime hi  Mizoram District hrang hrangah neih mek niin, October ni 17 (Ningani) hian Champhai-ah nei lehin kumin atana Seminar hi zawh fel a ni ang.