2526/2024-2025

15th October, 2024 : Vawiin khan State Level School Band Competition chu 1st Battalion MAP Ground Armed vengah neih a ni a, Pipe Band Girls-ah Govt Saitual High School Girls Band chu pakhatna an ni a, Pipe Band Boys-ah Govt Southern High School Hnahthial Boys Band chu pakhatna an ni bawk. Band competition-ah hian mipa leh hmeichhia a hrang ve ve-in an intihsiak a ni.

Mizoram Samagra Shiksha buatsaih State Level School Band Competition-ah hian Mizoram chhung District hrang hrang atangin Pipe Band 12 an tel a, kumin hi Aizawl District ni lo District dang an tel tum khatna a ni. Aizawl District atanga tel thin Govt Mizo High School te chu kum hmasa lamah National Level-ah lawmman an lak avangin tun tumah hian an tel thei rih lo a ni. Govt Saitual High School Girls Band leh Govt. Southern High School Hnahthial Boys Band-te chu Eastern Zone competition-ah Mizoram aiawhin an tel dawn a ni.

School Band Competition hi Ministry of Education-in Ministry of Defence-te nen thawk hovin kum tin a buatsaih thin a, State level leh Zonal level te chu Samagra Shiksha ten an buatsaih thin a, National level chu NCERT-in a buaipui thin a ni. Band competition hi chhawng thumin intihsiak thin a ni a. State level School Band competition neih hmasak ber thin a ni a, chuta pakhatna theuhte chu Zonal level competition-ah an inel leh a, Zonal level-a tithate chu National levelah an intihsiak leh ta thin a ni.

Zonal level-ah hian India ram state leh UT te hi zone li-ah an then a, Eastern zone, Western zone, Southern zone leh Northern zone tiin then a ni. Mizoram hi Eastern zone-ah kan awm a, Eastern zone-a awm te chu- Jharkhand, West Bengal, Odisha, Arunachal Pradesh, Assam, Meghalaya, Manipur, Mizoram, Nagaland, Tripura leh Sikkim te an ni. Zonal level competition-a tithate chu National level N.Delhi-ah an intihsiak leh ta thin a ni.