2527/2024-2025

Siaha the 15th October 2024: District Tuberculosis Forum, Siaha District-te chuan vawiin chawhma dar 11:00 khan DC Mini Conference Hall-ah thutkhawmna an nei a, Addl DC Pu Abraham Beirazi Khithie chuan he hun hi a kaihruai a ni.

Vawiin thutkhawm-ah hian Siaha District chhunga TB dinhmun sawiho a ni a, TB chu natna inkaichhawn awlsam tak a nih avangin invenna leh enkawl dan tur mipuite hnenah nasa lehzuala zirtirna buatsaih a pawimawh thu tarlan a ni. Siaha District chhunga khaw tam thei ang ber TB awm lohna khua (TB Free Village) a puan a nih theih nan theihtawpa hmalak ni se a ti a, TB free village ni tura tehna hrang hrang, khaw chhung mipui zawng zawng za zela 3 khak (sputum) test a, TB vei an awm lohna khua te free village a puan an nih theih thu tarlan a ni. Heng bakah hian Nikshay Mitra chungchang pawh sawiho niin TB vei mi harsa zualte Ei leh In tha an neih theih nana mipuite thawhkhawmna (Community contribution) a nih thu tarlan a ni a, hemi chungchanga Siaha Mipuite inpekna lawmawm an tih thu tarlan a ni bawk.

National TB Control Programme chu kum 1992 khan tan a ni a, Kum 2002 ah Revised National TB Control Program ti a thlak niin kum 2020 ah National TB Elimination Program a thlak leh a ni a, nakkum 2025 ah India atanga TB Eliminate tumna programme a ni.

District TB Centre Siaha-ah hian kumin January atanga vawiin Ni thlengin Sputum (khak) sample 314 test tawh niin heng zinga 34 te chu TB vei an ni tih hmuhchhuah a ni a, tun dinhmunah Treatment la mi 98 an awm mek bawk. District TB Control Forum in a tum ber chu TB vei te dinhmun hriatthiam pui a, chhawmdawl a, khawtlangah TB hluar zel tur titlem tura invenna kalpui te, Tb veite Ei leh In tha pek leh chhawmdawl te a ni.