2528/2024-2025

Siaha the 15th October 2024: District Tobacco Control Cell, Siaha huaihawtin vawiin khan DC Mini Conference Hall, Siaha-ah District Level Coordination Committee on Tobacco thutkhawmna buatsaih a ni a, Tobacco Youth Free Campaign 2.0 (TFYC 2.0) hawnna neih nghal a ni.

Hun kaihruaitu Addl DC Pu Abraham Beirazi Khithie chuan Mizoram tibuaitu ber leh mi tam tak nunna suattu hlauhawm tak Zuk leh hmuam chungchang thutkhawmna neih chu a pawimawh hle a ti a, tunlai thalaite leh nu leh pa te thlenga tibuaia, rampum buaipui mek ruihhlo ngawl vei tam tak te bultanna chu zuk leh hmuam a ni tiin awareness neih a pawimawh takzet a ti. Zuk leh hmuam do kawngah Sawrkar bakah NGO leh Kohhran pawhin hma a la nasa hle a, hmasawnna tak tak erawh hmuh tur a la tam lo tiin chhungkua a tanrual a ngai a, ‘fate fihlim tura kan duh chuan Nu leh Pa te entawntlaka kan nun a, kan fihlim a tul’ a ti bawk.

Sr Chief Medical Officer, Dr Lalnunziri chuan zuk leh hmuamin India ram leh a bikin Mizoram a tihbuai nasat thu a tarlang a. India ram chhungah kumtin zuk leh hmuam avangin mi nuai 13 chuangin nunna an chan phah thin thu te, Mipa bikah India rama cancer vei za zela 48, hmeichhe cancer vei zingah za zela 16.5 te chu zuk leh hmuam vang a nih thu a tarlang a, nasa zawka tan lak a ngaih thu leh a bikin zirlai naupangte chu zuk leh hmuam ti chhin lo tura zirtir a tul hle a ti bawk.

Siaha District Tobacco Control Cell atangin Zuk leh Hmuam tih rem na tura an hmalaknate leh hmachhawp an an neih te ngaihthlak a ni a, TYFC hun chhunga hmabak an neihte sawiho niin zuk leh hmuama mitin an fihlim theih dan tur ngaihtuahho a ni. Heng bakah hian TYFC chhung hian zirna In hrang hrangah zuk leh hmuam tilo tura inzirtirna neih nise tih a ni bawk a ni.

Tobacco Free Youth Campaign chu May Ni 31, 2023 khan World No Tobacco Day denchhana tan a ni a, tun hi a thawh hnihna niin Sawrkar laipuia Minister of State for Health & Family Welfare Pu Jadhav Prataprao Ganpatrao chuan September Ni 24,2024 khan hawnna a lo nei tawh a ni. TYFC in a tum ber chu Zuk leh Hmuam thatlohna a tam thei ang bera mipuite hnena puanzar te, Zuk leh hmuam chungchanga khauh zawka dan kenkawh te, Zuk leh Hmuam awmlohna khua (Tobacco Free Villages) siam te leh social media hmanga zuk leh hmuam in hriselna a nghawng theih dan puanchhuah te a ni. ‎