4585/2024-2025

Lunglei, 2025 Vau thla ni 8: Lunglei District Legal Services Authority (DLSA) leh Young Mizo Association (YMA) Sub-Headquarters Lunglei te ṭang kawp huaihawtin tukin zingkar khan Lunglei Green Mini Marathon 2025 buatsaih a ni a, a kharna leh lawmman semna hun chu Lunglei High Powered Committee (HPC) Vice Chairman Pu V. Malsawmtluanga chuan Khuallian niin a hmanpui.

Lunglei HPC Vice Chairman Pu V. Malsawmtluanga chuan infiamna chu taksa leh rilru hriselna atan te, ruihhlo dona atan te hmanraw pawimawh ber pakhat a nih thu sawiin, hei vang hian Mizoram sawrkar pawhin infiamna leh ṭhalaite tihhmasawnna a ngai pawimawh hle tih a sawi a. Sawrkar ruahmanna, Bana Kaih kal tlangin infiamna tihmasawn turin hma lak chhoh mek a nih thu sawiin, Lunglei HPC kal tlang pawhin infiamna hmunhma tihchangtlun bakah, infiam mite chawi san leh a theih ang anga ṭanpuina kawngah theih tawpa hma lak tum a nih thu a sawi a. Lunglei DLSA leh Sub-Headquarters YMA te hma laknaa environment humhalh inzirtirna leh infiamna chawi sanna atan ni kawpa green mini marathon buatsaih chu lawmawm a tih thu sawiin, environment humhalh kawngah harh thar zel turin ṭhalaite a chah a. Tui thianghlim hman tur hnianghnar kan neih theih nan tuihna tipung turin ramngaw humhalh a pawimawh thu sawiin, sawrkar pawhin ramngaw humhalh ngai pawimawhin ramngaw siamna tur te, chhehvel leilung leh boruak siam ṭhatna tur leh tuihna a pun zel theih nan te hma lak mek leh hmachhawp eng emaw zat a neih thu a sawi.

Lunglei Green Mini Marathon 2025 hi mihringte khawsak phung avanga chhehvel khuarel thil chereu zel chungchang leh a ven himna dan te, chhehvel leh mihringte hmakhua atana him zawka khawsak dan tur te inzirtirna (Special Campaign on Public Education on Environment Protection & Conservation Laws, Climate Crisis and Sustainable Practices) peng khat atana buatsaih niin, Lunglei Sub-Headquarters YMA hnuaia YMA branch hrang hrang member-te inelna a ni a. Tukin zing dar 6:45 khan Lunglei DLSA Chairman, Lunglei District & Sessions Judge Pu Vanlalenmawia chuan mini marathon-a tlan turte hi Lunglei Venglaia Tennis Court hlui aṭangin a vai liam a ni.

He mini marathon-ah hian mipa tan kilometre 9 leh hmeichhe tan kilometre 7-a thui tlan kawng (route) ruahman niin, Lunglei khawpui chhunga YMA branch hrang hrang aṭangin mipa 111 leh hmeichhia 40, an zavaiin mi 151 an tlan a. Result chu heti ang hi a ni: