4586/2024-2025

Aizawl, the 8^th March : Vawiin khan Power Pu F Rodingliana'n hmuh hnih ah kawlpetha tihchangtlunna a hawng a. Chhungte chu Sihmui atanga Zuangtui (Luangmual paltlanga) Sub-Station 132 kV Single Circuit Line leh 2X10MVA 33/11kV Chite Sub-Station bun thar te an ni. Chite Sub-Station hawnna ah hian Minister Pu C Lalsawivunga leh Ex- Minister, Power & Electricity lo enkawl thin Pu R Lalzirliana te pawh an tel a ni.

Heng hmuna hawnna programme ah te thu sawiin Power Minister Pu F Rodingliana chuan Mizoramin kawlpetha lamah kan intodelhna tura atana hma lakna hrang hrang kal mekte, kawlpetha lak leh semna kawnga line tihchangtluanna te, kawlpetha mumal zawka mipuiin an hmuh thei nan Department hmalakna te tarlangin hengte hi Sawrkarin in a ngaihpawh hmasawnna tluantling leh inhen chho sustainable development hma lakna zel a nih thu te a sawi a ni. Sawrkar in kawlpethaa intodelhna chu a ngaihpawimawh avangtein Tuivai, Chhimtuipui, Turini leh Tlawng khuahna tur chu a tharthawh leh thusawiin heng mai ni lo, nizung atanga kawlpetha siamchhuah kawngah te pawh tan lak mek dante a sawi lang bawk.  

Power Minister chuan line hlui Sihmui to Zuangtui chu Department in sum awm ang angte dapin, hmanraw la hman theih a hlui te pawh pawtkhawmin Department engineer ten ngaihtuahna seng takzetin thahnemngai takin hna hi thawh tih a sawi a. Tunah kan kawlpetha lak luh pangngai chu PGCIL hoin Conductor chak zawk (HTLS) in an thlak mek a, he lian PGDCIL in an siam that chhung zawngin he line 132kV Single Circuit kan hman avangin thim loin kawlpetha supply regular takin kan neih zui theih phah dawn a, line siamthat avanga shutdown te pawh a tlem phah a beisei tih a sawi bawk a ni.  

132kV line Sihhmui to Zuangtui Via Luangmual Sub-Station hawnna hi 132kV Sub-Station, Zuangtui Control Room-ah neih  niin, Er Lalnithanga, Engineer-in-Chief, Power & Electricity Department chuan inlawmna thu leh Technical Report te a sawi a. Hemi hnu hian 2x10MVA, 33/11kV Chite Sub-Station hawnna chu Chite Sub-Station hmunah neih zui nghal a ni a, a hawnna inkhawm hi Pi Lalrinzuali, IAS, Secretary, Power & Electricity chuan a kaihruai a, Rev. C Zorammawia’n hunserh hmangin, Er Lalnithanga, Engineer-in-Chief, Power & Electricity Department chuan technical report a pe a ni.  

132kV (Sihmui to Zuangtui) line thar hian Mizoram 132kV Sub-Station lian pathum - Zuangtui, Luangmual leh Sihhmui te a thlun zawm vek avângin he'ng Sub-Station te hian line chhiat leh maintenance avânga shutdown lâk a ṭûl châng pawhin Power lâk luhna line dang an neih tâk vek avâng hian power supply khaihlak lovin kan neih tluan theih phah dâwn a ni. 

Chite Sub-Station hi Ministry of DoNER hnuaia North Eastern Special Infrastructure Development Scheme (NESIDS) atangin thawh a ni a, senso zawng zawng Rs 10,28,57,992.00 hi DoNER in a tum vek a ni. He Sub-Station-ah hian 10MVA, 33/11kV Transformer 2(pahnih) dah a ni a, Zuangtui leh Mualpui Sub-Station atangin power a la lut thei a, 33kV level-a power pêk chhuah theihna (Outgoing bays) pahnih a nei bawk - heng te hi Zokhawsanga Assam Rifles hmun leh RIPAN Zemabawk-a Power pêk chhuah nâna hman theih dawn a ni. 

Chite Sub-Station aṭang hian 11kV feeder pali (Bethlehem Vêng Feeder, Ramthar Feeder, Falkland Feeder leh New Jail Feeder)  a chhuak ang a, heng feeder-te hian Sub-Station te chhawk zangkhaiin veng engemaw zat mumal zawkin power supply a pe thei dawn a ni.