4587/2024-2025

Siaha the 8th March 2025: Vawiin chawhma dar 11 khan MADC Golden Jubilee Hall, Council Vaih-ah Evangelical Church of Maraland (ECM) hnuaia Krizyhpa Nô Py (KNP) Headquarters leh District Hub for Empowerment of Women, (DHEW) Women and Child Development, Siaha buatsaihin International Women’s Day-2025 lawmna leh HIV/AIDS Awareness Campaign neih a ni. Kumin International Women’s Day thupui chu "Accelerate Action" tih a ni. Vawiin hun hmannaah hian ECM KNP Headquarters leh Siaha khawpui chhunga KNP Branch hrang hrang aiawh mi 200 vel an tel.

Programme hi chhawng hniha hman niin, Session khatna hi Pi NT. Sanô, President, ECM KNP Headquarters chuan a kaihruai a, Pi P. Chaki, Town Executive committee Member leh Beti Bachao, Beti Padhao district Ambassador nibawk chuan hunserh a hman bakah thusawina hun a nei bawk. 

Pi P. Chaki chuan “kohhranah chauh kan rawngbawlna a tawp tur a ni lova, chhungkua, khawtlang leh ram tan hna thawh tur tam tak a awm avangin nute hian tha kan thlah thiang lo va haider kan nei tur a ni lo” tiin kalkhawmte fuihna thu a sawi.

Resource Person Pi Hepaw Hlychho, Child Development Project Officer, Siaha District chuan, thupui hrang hrang, “International Women’s Day pawimawhna te, Kawng hrang hranga hmeichhiate hlawhtlinna, Intluktlanna kawnga chona la awm thei te, tih leh Engtin nge hmeichhe dangte nen kan intanpui tawn theih ang” tih thupui hmangin kalkhawmte a zirtir a ni. 

Pi B. Zisia, DMC, DHEW, Siaha chuan Mission Shakti sawifiahna hun a hmang a, Siaha district chhunga hnathawh leh hmeichhia leh naupangte tana tanpuina leh chhawmdawlna an kalpui hrang hrang a tarlan bakah hun remchang a awm chuan office tlawh turin kalkhawmte a sawm bawk a ni.

Second Session hi Pi HC. Zirtei, Vice President, ECM KNP Headquarters chuan a kaihruai a. Dr. Lalnunziri, Sr. CMO, Siaha in HIV/AIDS chungchang zirtirna hun a nei a, zawhna leh chhanna hun hman a ni bawk.

International Women’s Day Pledge pual hian kalkhawm zawng zawng ten thutiamna an nei.  

*Hmeichhiate dikna chanvo chhuhsak a,  Hleilenna, khuaikhem leh chhaih nawmnah tawk thinte;  Rahbeh leh vau thaihna-te,  Heng thil thleng avanga nunna hlu tak an chan thinte leh; Pian hlim atanga en hranna an tawk thinte hi ka dodal a. He International Women’s Day atang hian Hmeichhia tupawh – Naupang leh puitling, an dikna chanvo dik tak an chan theihna turte; Intluktlanna khawvel hmeichhe tinte’n an neih theihna tur leh; A chak lote tichak a, dawm kanga, kawng kawhhmuhtu ni zel turin theihtawp ka chhuah ang tih ka intiam e.

Pi F. Ngôbu, Treasurer, ECM KNP Headquarters chuan lawmthu sawina hun a hman zawhah tawngtairualna neih a ni a, hun hman tihtawp a ni.