2609/2024-2025

2024 Khuangchawi thla ni 19: Vawiin khan Lunglei High Powered Committee (HPC) Vice Chairman Pu V. Malsawmtluanga chuan Young Mizo Association (YMA), Pukpui Branch, Lungleiin Pukpui YMA Hall-a an kum 50 tlin (golen jubilee) lawmna hun an buatsaih chu Khuallian niin a hmanpui.

Khuallian Pu V. Malsawmtluanga chuan Pukpui Branch YMA member-te chu golden jubilee chibai bukin, Branch YMA dintu leh keng nungtu hruaitute zahna chibai a buk bawk a. YMA chu pawl ropui tak, Zo hnam din chhuahna tura thawktu leh Zo nun ze mawi - tlawmngaihna, rinawmna, aia upa zahna leh hnam ziarang hrang hrang chawi nungtu a ni tiin, YMA chu Pathianin Zofate malsawmna a vur zinga pakhatah a ngai tih a sawi a. Pukpui Branch YMA-in khawtlang leh ram tana an hma laknaah an mamawhte a hnena thlen hreh lo tura chahin, sound system an tuak mek atan pawh golden jubilee lawmna pualin sum faia ṭanpuina a hlan tur thu a puang nghal a ni.

Pu V. Malsawmtluanga chuan Pukpui chu khawtlang lungrual leh ṭang rual an nih bakah, hna thawh kawngah pawh an taimakna a fakawm tiin, an inlungrualna leh taimakna te chhawm nung zel a, sawrkarin mi taimate din chhuah nana "Bana Kaih" scheme a ruahman pawh a chhawr bertu nih tum turin a chah a. Sawrkarin ram leh hnam din chhuah nan hma a la chho zel a, chumiah chuan YMA leh ram mipuite thawhpuina an mamawh tih sawiin, Pukpui chu Lunglei tui lak hnar Pialthleng awmna a nih angin tuihna siamtu ramngaw humhalhnaah pawh ṭan lak chhunzawm zel turin a chah a. Sawrkarin ram hmasawnna tur a ruahman zingah Pukpuia Health & Wellness Centre leh Kawmzawla Health Sub-Centre din turin hmachhawp a awm mek tih a tar lang bawk. 

Pukpui Branch YMA golden jubilee lawmna pual hian zing dar 10-ah Pukpui YMA Hall kawt (khelmual sir)-a golden jubilee hriat rengna lungphun chu Branch YMA Founder Vice President Pu P. Chalṭhianga chuan hawngin, hruaitu hlui leh hruaitu ni laite'n jubilee darkhuang vawi 50 an khawng ri a. YMA Hall-a golden jubilee lawmna hun khatna chu Branch YMA Vice President Pu T. Lalngaizuala'n kaihruaiin, Rev. H. Roṭhuama'n hunserh a hmang a. Pukpui Branch YMA member chatuan ram pan tawhte sunna hun hman niin, an pualin ngawi rengin minit 1 din a ni a. Branch Secretary Tv. C. Lalrempuia leh Assistant Secretary Pu B. Lalremsanga te kaihhruaiin hruaitu chawimawina hun hman niin, hruaitu lo ni tawh leh ni lai mi 80 hnenah chawimawina thuziak hlan a ni a. Lunglei Sub-Headquarters YMA Treasurer Pu K. Vanlalhruaia leh Branch YMA President Pu Zodinsanga Ralte te'n thu sawi bawkin, zaithiamte zai ngaihthlak a nih bakah, kal khawmte'n YMA Thuthlung an sawi rual bawk.

Pukpui Branch YMA golden jubilee lawmna hun hi Lunglei Municipal Council (LMC)-a Executive Councillor, Ward No. I bialtu Pi Lalhruaitluangi Sailo bakah, Lunglei Sub-Headquarters YMA hruaitute, Serkawn Branch YMA hruaitute, Pukpui Local Council, MHIP leh MUP hruaitute leh Branch YMA hruaitu hluite pawhin an hmanpui a. Golden jubilee lawmpui nan hian Sub-Headquarters YMA chuan thuziak hlanin, Serkawn Branch-in dekchi lian an hlan bawk.

Pukpui Branch YMA hi April ni 15, 1974 khan din a ni a. Tun dinhmunah member 926 awm mekin, section 3-ah an inṭhen a. Golden jubilee lawmnaah hian thupuiah "Fai la, hrisel rawh" tih hmangin, April ni 15, 2024 khan Founder President Pu H. Doruma hovin an lo hawng tawh a. Infiamna chi hrang hrang hmanga section inelna buatsaihin, vawiin golden jubilee lawmna khar ni hian a hun hnihnaah LDF Park, Pukpuiah hnam lam, zai leh infiamna chi hrang hrang hmangin intihhlimna hun an hman chhunzawm a. Tlai lamah jubilee lawmna ruai an kil ho bawk a ni.

Attachment

  • Loading attachment...