2608/2024-2025

Aizawl dated 19th October 2024: Vawiin khan Eye Care Hospital kum 25 tlin lawmna hun chu Conference Hall, Eye Care Hospital, Dawrpui South-ah hman a ni a. Pu B.Lalchhanzova, Minister of State, Food, Civil Supplies & Consumers Affairs Department chu khuallian niin  25th Anniversary pual hian Eye Care Hospital tihchangtlun nana 3rd Floor siam thar chu a hawng a. Dr. Lalbiakkima, President, Mizoram State Medical Association leh Dr. Aniruddha Maiti, Director – Global Eye Hospital, Kolkata-te chu khual zahawm an ni a. Dr. David L.Khiangte, Consultant Ophthalmologist, Eye Care Hospital chuan hun a kaihruai a ni.

Supply Minister Pu B.Lalchhanzova chuan mipui rawngbawl nana thiamna bik neite hi Sawrkar hmanraw tangkai tak an nih thu tarlangin Eye Care Hospital-a thawktute inpekna fakawm a tih thu a sawi a. Mipui min mamawhtute leh mi harsa zawkte ban phaka awm hi rawngbawlna pawimawh berte zing ami a nih thu sawiin Eye Care Hospital kum 25 tlin a lawmpui thu a sawi bawk a ni. Pu B.Lalchhanzova chuan, min mamawhtute harsatna sukiang theitu ni tur a kan thiamna leh theihnate hman thin a tul thu sawiin hemi kawngah hian mahni hmasialna leh chapona te dah bo fo a tul thu a sawi a. Kan ram neih chhun tihmasawn tur hian kan theihna zawn ah tangkai kan tum theuh a pawimawh thu sawiin mithiam leh mi hmatlak dapchhuah leh thawhho pui thiam chu Sawrkar mawhphurna pawimawh tak a nih thu a sawi bawk a ni.

Eye Care Hospital kum 25 tlin lawmna ah hian Dr. KL Remsanga, Managing Director chuan kalkhawmte lawmna thu a sawi a. Khuallian Minister Pu B.Lalchhanzova chuan Silver Jubilee Souvenir tlangzarhna hun hmangin Dr. Aniruddha Maiti leh a team-ten ‘Live Surgery on Retinal’ leh ‘Live Surgery on Anterior Segment’ tih thupui hmangin zirtirna an pe a ni.  Continuing Medical Education Credit Programme a chhunzawm niin Civil Hospital, Aizawl, Zoram Medical College, Synod Hospital, Durtlang, Agartala Govt. Medical College, Global Eye Hospital, Kolkata, Chandraprabha Eye Hospital, Jorhat leh Amulya Jyoti Eye Foundation, Kolkata atanga mithiam ten mit natna leh a enkawl dan hrang hrang thupuia hmangin zirtirna an pe a ni.

Eye Care Hospital (Eye Care Centre ti a hriat ni bawk) hi August ni 1, 1999 khan din a ni a, a tirah chuan eye clinic anga bul tan niin a hnuah Eye Hospital ni tura tihchangtlun chhoh zel a ni a. September ni 19, 2020 khan Christian Hospital, Serkawnah Satellite Vision Centre an hawng tawh bawk a ni.

Eye Care Hospital hi member 4 awmna Board of Directors in a enkawl mek a. Thawktu Eye Surgeon 2, Staff Nurse 3, Optometrist 5, IV Grade 2, Optician 3, Administrative Staff 4 leh Visiting Surgeon (Mizoram pawn atanga lo kal doctor thiam bik) 4 an awmin B.Sc. Optometrist Intern 4 an awm mek bawk a ni.

Kum 2015 July ni 1 atanga September ni 31, 2024 inkarah hian Eye Care Hospital-a mit entir mi 60841 an awm a, cataract surgery vawi 3643 tih a ni a (Small Incision Cataract Surgery – 115, Phacoemulsification Cataract Surgery – 3528). LASIK surgery vawi 1815 (Mipa – 634, Hmeichhia – 1181) tih a ni a. Keratoplasty vawi 7, Retina Treatment vawi 904 nei tawhin Free Eye camp leh School Eye screening-te an buatsaih thin bawk a ni.