2607/2024-2025

Saitual, the 18th October, 2024: Vawiin khan DC Conference Room Saitualah District Bawrhsap Dr. Lalngura Tlau hoin Ministry of Rural Development hnuaia National Level Monitoring te chu an thu khawm a, Saitual an awm chhunga an tlawh tur khuate an rel.

He hunah hian Dr. Lalngura Tlau chuan National Level Monitoring atanga lo kal Pu Shailesh Kumar leh Anil Sharma chungah lawmthu a sawi a, kalkhawmte nen inhmelhriattirna hun a hmang nghal a ni. Bawrhsap chuan an awm chhunga hun hlawk thlak tak hmang turin duhsakna a hlan a, khaw hrang hrang an tlawh kual hnuah Saitualah lo let lehin an thil zirte sawikhawmna hun an neih leh theih a beisei bawk a ni.

Pu Anil Sharma chuan kalkhawmte chuan tha taka an lo dawnsawn avangin lawmthu a sawi a, National Level Monitoring (NLM) te chu Ministry of Rural development-in scheme hrang hrang hnuaia hnathawh mekte endik turin a rawn tir a ni tih a sawi a, sawrkar chuan mipuiten hamthatna an lo dawn theih nan theih tawp chhuahin he NLM pawh hi a din a ni, a ti.

NLM te chuan Saitual District an awm chhung hian khaw hrang hrang- Phullen, Thanglailung, Luangpawn, Ngopa, Hliappui, Pawlrang, Buhban, Dilkhan, Lungpher leh Sihfa an tlawh dawn a. Rural development hnuaia scheme hrang hrang- MGNREGA, DAY-NRLM, NSAP, PMAY-G, DDU-GKY, SAGY, PMGSY, PMKSY, SVAMITVA, DILRMP, RSETI leh Panchayat basic verification te chu district-a kalpui a nih dante an endik dawn a ni.

He thutkhawmah hian District Bawrhsap Dr. Lalngura Tlau, Pu Shailesh Kumar, NLM, Pu Anil Sharma NLM, Pu V. Laldinsanga, Project Director, DRDO, Pu Lalthakima Chhangte, SDO (S), Pi Christina Lalnunfeli, SDC, Pi F.Zodingpuii, DIPRO, Pu C. Lalfakzuala SDO (PWD), Pi Helen Zomuanthangi, ARDO, Pu Robert Lalnuntluanga, APO leh Pu K. Lalrintluanga, JE (PWD) te an tel a ni.