2606/2024-2025

2024 Khuangchawi thla ni 18: Vawiin khan Lunglei Theiriata Pu F. Ramfangzauva sumdawnna, RAFA Pro Biotics Juice chu Pu F. Lalramnghinglova Inah Lunglei District Horticulture Officer Pu B. Lalzarzova chuan a tlangzarh.

Lunglei DHO Pu B. Lalzarzova chuan Lunglei District-a kut hna thawktute thei thar chhuah a hringa hralh zawh vek theih lohte sawngbawl a, theitui (juice) tuihnai taka siam chhuak thei an awm chu lawmawm a tih thu sawiin, RAFA Pro Biotics Juice-in hun eng emaw chen harsa taka an beihna rah chhuah hlawhtlinna an hmu thei chu a lawmpui thu a sawi a. Hlawhtling taka kalpui tur leh hma sawn zel turin duhsakna a hlan a ni.

Lunglei DHO chuan thei hring hralhnaa buai ṭhinte pawhin juice-a siam theitu an awm tawh avangin thar chhuah lamah ṭan la nasa lehzual se a duh thu sawiin, Lunglei Dragonfruit Growers Association te pawh kum dang aia thar chhuak tam tura ṭan la turin a chah bawk a. Horticulture, NEIDA Lunglei District leh Farmers Producer Company Ltd Lunglei District te ṭang hovin Horticulture Office Lunglei Ground Floor-ah Horticulture Wholesale Centre an din tih sawiin, hetah hian hmun hrang hrang aṭangin kut hna thawktute thlai thar lak khawm ṭhin a nih thu leh mipuite leh khar chhawngte tan man man zawka lei theiha zawrh chhuah ṭhin a nih thu a sawi bawk.

He hun hi Pu F. Lalramnghinglova'n a kaihruai a. Lunglei District Dragonfruit Growers Association President Pu R. Lalthanmawia leh NEIDA Lunglei District-a District Co-ordinator Pu R. Lalrambeiseia te'n thu an sawi a. RAFA Pro Biotics Juice neitu Pu F. Ramfangzauva hnen aṭangin report ngaihthlak a ni bawk.

Rafa Pro Biotics Juice-ah hian thei chi sawm - theiria, chengkek, tengtere, dragonfruit, balhla, theite, sapthei, sunhlu, pear leh lakhuihthei tui sawr te a awm a. Mi tin, naupang aṭanga puitling thlenga in vek theih turin tualchhunga thei rah thar chhuahte hmangin theitui (juice) hi siam a ni.

RAFA Pro Biotics Juice chi hrang hrangte hi Lungleia Horticulture Wholesale Centre, Horticulture office building ground floor-ah October chawlhkar lina aṭangin lei theiha chhawp chhuah a ni dawn a. Um (bottle) khat hi 750ml niin, ₹ 350/- man a ni ang.