2605/2024-2025

2024 Khuangchawi thla ni 18: Vawiin khan Lunglei High Powered Committee (HPC) Vice Chairman Pu V. Malsawmtluanga hovin Project Save Tlawng te chu HPC Conference Hall, Lungleiah an ṭhu khawm a. Lunglei District-a solar park siam tura hma lakna chungchang an sawi ho.

Project Save Tlawng te hian Lunglei District-a solar park siam tura ruahmanna awm chu hlawhtling ngei se an duh thu sawiin, chhehvel khuarelin a chhiatpui loh nan enviromental clearance atana ṭul leh pawimawh te ti vek a, dan bawhchhe lova hma lak ni se an duh thu HPC Vice Chairman hnenah hian an thlen a. HPC Vice Chairman chuan solar park siam tur chu rawt mek (proposal stage) chauh a la ni tih sawiin, solar park siam tura hma laknaah hian dan leh hrai kim taka zawm thlapin hma lak a ni dawn tih a sawi a ni.

Vawiin vek khan HPC Vice Chairman Pu V. Malsawmtluanga ho hian HPC Conference Hall-ah Lunglei Electric Veng khelmual zauh leh thawm ṭhat dan tur sawi ho a ni bawk a. He hunah hian LMC executive councillor pahnih - Pu Zorinsanga Hmar leh Pi Lalhruaitluangi Sailo te leh Ward VI Councillor Pu R. Lalremsiama te bakah, Lunglei Electric Veng Local Council ai awh leh Branch YMA ai awh te leh Lunglei District Football Association (LDFA) hruaitute telin, Lunglei Electric Veng khelmual hi Lunglei mipuiin an hman ṭangkai zawk theih nana hma lak dan tur an sawi ho va. Meeting zawh hnu hian Electric Veng khelmual hi a hmunah kal chilhin an en ho nghal a ni.