2604/2024-2025

2024 Khuangchawi thla ni 18: Vawiin khan Lunglei High Powered Committee (HPC) chu Vice Chairman, Pu V. Malsawmtluanga MLA hovin HPC Conference Hall, Lungleiah an ṭhu khawm.

Pu V. Malsawmtluanga chuan member-te lawmna thu sawiin, Lunglei District-ah HPC kal tlanga hmasawnna hna ṭha zawk leh chak zawka thawh a nih theih nan ruahmanna leh rawtna awmte chu ngunthluk taka ngaihtuah ho turin member-te chu a sawm a ni. 

Vawiin HPC ṭhut khawmah hian Lunglei South bialtu MLA Pu Lalramliana Papuia pawh telin, Member Secretary, Lunglei District Bawrhsap Pu R. Lalṭhazuala chuan thu ngaihtuah turte a sawi zau va. August ni 19, 2024-a Hon'ble Chief Minister Pu Lalduhoma hova HPC ṭhu khawm thu relte bawhzui dan tur sawi ho niin, HPC hma lakna tura rawtna leh hmachhawp hrang hrang sawi ho a ni bawk.

He hunah hian Lunglei khawpui chhunga lirthei dahna tur, multi level car & smart parking mamawh phuhrukna tur chungchangah UD&PA-in PMJVK hnuaia Lunglei Government College bula public car parking sakna tur an rawtna leh DC office-in SASCI hnuaia Lunglei DC office complex-a lirthei hunna tur in sakna tur rawtna an theh luh tawh chu a hlawhtlin theih nan HPC aṭangin chak taka um zui ni se, tih a ni a. Khawpui chhung lirthei chet velna chep lutuk tur tihthawlna leh lirthei tlan dan felfai leh him zawk a awm theih nana ring road project ruahman chungchang chu a ṭul anga bawhzui ni se, tih a ni a. Serkawn Bazar Shed sak ṭhat a nih theih nan Lunglei Municipal Council (LMC) lam nen inrawn tlangin hma lak zui ni se, tih a ni bawk a. Lunglei DC office aṭanga PMJVK hnuaia hna thawh tur (project) rawtna hrang hrang theh luh zinga HPC aṭanga um zui ngai turte thlir ho ni bawkin, a ṭul anga um zui ni se, tih a ni bawk.