1365/2024-2025

2024 Vawkhniahzawn thla ni 30: Vawiin khan Mizo Students' Union (MSU), Regional Headquarters, Lunglei te'n Saikuti Hall-a MZU hnuaia under graduate examination 2024-a rank holder-te lawmpuina hun an buatsaih chu Lunglei High Powered Committee Vice Chairman, Lunglei North Bialtu MLA Pu V. Malsawmtluanga chuan Khuallian niin a hmanpui a. He hunah hian Lunglei Municipal Council (LMC) Vice Chairman Pu K. Lalrinawma chu khual zahawm niin, MSU General Headquarters-a General Secretary Pu Lalramhluna Fanai chu uaptu a ni.

Khuallian Pu V. Malsawmtluanga chuan zirlai hlawhtlinna changte leh an chhungte a lawmpui thu sawiin, an hma lam hun atan duhsakna a hlan a. MSU te'n zirlaite tan leh ram leh hnam tana hma an lak ṭhinna chhuanawm a tih thu sawiin, lawm thu a hrilh nghal bawk a. Sawrkarin inrenchem a kalpui zarah sawrkar sum dinhmun pawh a ziaawm chho hret hret tih sawiin, tun hnaia casual teacher lak bakah hna dang pawh a tahtawla lak chhoh zel tum a ni a, chu'ngah chuan politics vanga induhsakna leh inthliarna a awm dawn lo va, a taima leh thawk rim, a thiam thiam lak an ni zel dawn tih a sawi a. Zirlaite leh mipuite chuan sawrkar kal fuh tawk lohna a awm a nih chuan sawisel hreh lo tura chahin, kalphung thar leh ṭha zawk ni tura an ngaih anga an hma laknaah erawh mipuite thlawpna leh thawhpuina an mamawh dawn tih a sawi.

Pu V. Malsawmtluanga chuan zirlai kal khawmte chu "Vawi hnih peih lo an fail fan," tih hre reng a, teirei peih tur leh ruihhlo laka inthiar fihlim turin a chah a. Zirlai nih laiin ngaihzawng neih aiin rilru neih a pawimawh zawk tih sawiin, a bik takin chhim mi zirlaite chu tun hmaa, "Chhimah thluak a awm," an lo tih ṭhin dikna pho chhuak tura ram leh hnam tan harh thar a, ṭan la thar turin a chah a. Pathian thu, "Thawh rimna zawng zawngah hlawkna a awm," tih a taka chang thei tura thawk rim turin zirlaite chu fuihin; thawk rim tur chuan zing thawh tlai a rem lo va, mut tlem a, thawh tam a ngai a ni, a ti.

Khual zahawm Pu K. Lalrinawma chuan zirlai hlawhtlinna changte leh an chhungte a lawmpui thu sawiin, an hmabakah duhsakna a hlan a. Zirlaite leh ṭhalaite chu hnam dang el phaka rilru zau tak pu tur leh thil thlir zau tura chahin, lehkha chhiar tam turin a fuih a. Nun ho awlsam nan inzah tawn a pawimawh thu sawiin, mi ropui leh hlawhtling ni turin mi dangte zah thiam a pawimawh, a ti a. Ṭhalaite chu zirlai nih lai aṭanga rilru puitling tak pu tur te, politics ngaihven a, ram leh hnam hmangaih tur te, hlawhchham huama thil hmachhawn ngam tur tea chahin, hna hmuh nan mai ni lo va, mi dang tana malsawmna ni tur leh ram leh hnam tana mi ṭangkai ni tura lehkha zir turin a fuih a ni.

Uaptu Pu Lalramhluna Fanai chuan tun dinhmunah khaw 89-ah MSU a ding mek tih sawiin, MSU chu Mizo zirlaite tan leh ram leh hnam tan an ding reng dawn tih a sawi a. Tun hnaia casual teacher lak danah thiamna neih ngai, certificate neite chauh dil theiha tih a ni chu lawmawm an tih thu sawiin, Mizoram zirnain hma a sawn theih nan theih tawpin hma an la zel dawn tih a sawi a. Zirlaite tan social media hman tam loh a ṭhat thu sawiin, Pathian ṭihna nena lehkha zir a, hlawhtlinna tluantling chang a, dikna leh rinawmna nena ram enkawltu ni turin zirlai kal khawmte chu chahin, duhsakna a hlan a ni.

He hun hi MSU Regional Headquarters Lunglei Vice President Roluahpuia'n kaihruaiin, Adviser Rbt. H. Lalroluahpuia'n hunserh a hmang a. Secretary Lalthangliana'n MSU Regional Headquarters Lunglei hma lakna report pein, President Lallianpuia'n inlawmna leh zirlaite fuihna thu a sawi a. MSU Leitlang Kulva Cultural Club te'n hnam lam entirin, zaithiam zai te ngaihthlak a ni a. Treasurer C. Lalthlamuansanga, Assistant Secretary TH Lalhnehliana leh Secretary i/c Information & Publicity C. Lalduhawma te kaihhruaiin zirlai hlawhtlinna changte lawmpuina hlan niin, Finance Secretary Henry VL Ramdailova'n lawm thu sawiin hun a khar a ni.

Vawiina zirlai ti ṭhate lawmpuina hun buatsaihah hian MSU Regional Headquarters Lunglei huam chhunga zirlai ti ṭha, kum 2024 under graduate examination-a rank holder chin mi 20 hnenah chawimawina thuziak leh puanbah hlan niin, MSU Regional Headquarters Lunglei hruaitu zinga hlawhtlinna chang mi 3 hnenah lawmpuina thuziak leh puanbah hlan a ni bawk.

Vawiina zirlai ti ṭha lawmpuina hlante chu he'ng mite hi an ni:

[Higher and Technical Institute Mizoram (HATIM) aṭanga chhuakte]

1. R. Lalruatpuii, 2nd Rank, Bachelor of Social Work (BSW) D/o R. Lalrinsanga, Bazarveng
2. Esther B. Lalhlimpuii, 3rd Rank, BSW D/o B. Romuana (L), Venghlun
3. H. Lalmuanzuali, 1st Rank, Bachelor of Arts (Philosophy) D/o H. Lalfakzuala, Serkawn
4. Laldampuii, 4th Rank, BA (English) D/o Robert Lalnuntluanga, Electric Veng
5. PC Lalremzuali, 4th Rank, BA (Psychology) D/o PC Lalhmunliana, Serkawn
6. Noel VL Zikpuii Pachuau, 2nd Rank, Bachelor of Commerce (B.Com) D/o Lalṭhakima Pachuau, Zobawk North
7. Lalhriatpuii, 4th Rank, B.Com D/o Lalngaihawma, Venglai
8. Lalhruaizela, 10th Rank, Bachelor of Computer Application (BCA) S/o Lalremruata, Zobawk Venglai

[Government J. Buana College (GJBC) aṭanga chhuakte]
1. K. Lalpekmawii, 5th Rank, BA (Mizo) D/o K. Zohmingliana, Bazarveng
2. Lalkhawngaihi, 5th Rank, BA (Economics) D/o C. Zalawma, Venghlun
3. C. Lalchhanchhuaha, 8th Rank, BA (Political Science) S/o C. Zalawma, Electric Veng

[Lunglei Government College (LGC) aṭanga chhuakte]
1. C. Vanlalnghaka, 6th Rank, BA (Geography) S/o C. Lalramdina, Bazarveng
2. Ramdinliani Pachuau, 9th Rank, BA (Philosophy) D/o Zoramsanga Pachuau, Venghlun
3. Laldinpuia, 6th Rank, Bachelor of Science (Mathematics) S/o Lalrinmawia, Electric Veng
4. LH Lalhriatpuii, 4th Rank, B.Sc (Zoology) D/o LH Rothanga, Ramthar

[Pachhunga University College (PUC) aṭanga chhuakte]
1. T. Lalrinfeli, 2nd Rank, BA (Psychology) D/o T. Rosiama, Farm Veng
2. Mimi C. Zothanpari, 10th Rank, B.Sc (Environmental Science) D/o C. Lallianzuala, Sethlun
3. T. Lalremsangi, 4th Rank, B.Sc (Statistics) D/o T. Lalduhkima, Zobawk
4. C. Lalrinchhani, 10th Rank, B.Sc (Biotechnology) D/o Lalrinmawia Chhangte, Bazarveng
5. Zonunsangi Tlau, 6th Rank, BA (Sociology) D/o T. Lalchamliana, Chanmari

Attachment

  • Loading attachment...