1364/2024-2025

Dated Serchhip, the 30^th July, 2024: Vawiin khan Serchhip DC Pu Paul L. Khuma hovin a pisaah Lumtui Zau, Zawlpui, Serchhipa chirh leh leitawlh vanga lo neitute harsatna tawh dan sawihona neih niin hmalak chhunzawm zel dan tur an rel.

Kawngpui laih zauin a nghawng kal zelah furpui a lo thlen tak bawk si avangin spoil bank atanga chirh leh lei tawlhin Zawlhpui leilet a tichhe nasa hle a.  DC Office kaihhruaiin July ni 16, 2024 khan Zawlpui leilet te a hmunah kalchilhin enho a lo ni tawh a. Hemi tuma an thutluknate  bawhzui a nih dan te vawiin meeting ah hian sawiho a ni.

Contractor leh NHIDCL hotute hian an hmalak dan meeting ah hian an thlen a. An hmalaknaah duhkhawp lohna a la tam avang leh leilet neitute harsatna chinfel a la nih loh cheu avangin, August ni 5 hian leilet hmunte chu DC Office kaihhruaina hnuaiah enho leh tura ruahhmanna siam a ni.

Vawiin meeting-ah hian DC Office atangin Addl. DC Pu Lalrinzuala leh SDC Pu Lalhruailiana Zote te an tel a. NHIDCL atangin EE Pu Rahul Kumar a tel a; KRAM Infracon atangin AGM Pu Manoj Kumar, Addl GM Pu Sachin Masih, leh PM Devendra Verma te an tel a. Lumtui Field Management Committee atangin Pu C. Lalramzauva, Pu PC Zosangliana leh Pu Laltlanthanga te an tel bawk a ni.