2364/2024-2025
2024 Khuangchawi thla ni 3: Ni hnih chhung (October 3 & 4, 2024) awh tur hnam zai, hnam lam, thu leh hla leh mimal thiam thil hmanga Mizorama Ekalavya Model Residential School (EMRS)-te intihsiakna inkhawmpui, "3rd EMRS Mizoram State Level Cultural & Literary Fest & Kala Utsav 2024" chu EMRS Lungleiah nghah niin, vawiin chawhma khan Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan EMRS Lunglei Multipurpose Hall-ah a hawng.
Lunglei HPC Vice Chairman Pu V. Malsawmtluanga chuan lehkhabu chhung thu zirna ngawr ngawr piah lama zirlaite'n rilru, taksa leh thiam thil lama hriselna leh hmasawnna an neih theihna tura EMRS-in inelna thianghlim an buatsaih ṭhin chu lawmawm leh hlu a tih thu sawiin, chu chin dan ṭha chu chhunzawm a, hmasawnpui zel turin duhsakna a hlan a. Hnam anga din chhuah nan zirna bakah infiamna leh mimal thiam thil hai chhuah a pawimawh tih hriain Mizoram sawrkar chuan infiamna hmunhma leh hmanrua tichangtlung turin theih tawp a chhuah mek tih sawiin, thingtlang ṭhalaite'n infiamna lama hma an sawn theih nan sawrkar chuan an khuaa kal chilh turin zirtirtu (coach/trainer) a tir ṭhin dawn tih a sawi a. Sawrkarin a ngaihna hria leh thawk rim, an bul ṭanna tura sawrkar puih mamawh site tan "Bana Kaih" a ruahman chu an zir chhuah hnua an chhawr theih nan rilru nei taka lehkha zir turin zirlaite a fuih a. Tum nei rana lehkha zir tur te, mi dang lak aṭanga anmahni tihnual thei zawnga thu sawi ngaithla lo tur leh an thil tihna kawng tinrengah hlawhtling tlaka thawk rim tur te'n a fuih bawk.
He hun hi Lunglei District Bawrhsap, District Level Committee on EMRS Chairman Pu R. Lalṭhazuala chuan kaihruaiin, kal khawmte lawmna thu a sawi a. Baptist Church of Mizoram (BCM)-a Education, Social Concern, Relief & Development Director Rev. L. Vanlalsanga'n hunserh a hmang a. Mizoram EMRS Society-a Programme Manager Pu Lalhmingmawia Sailo chuan EMRS chungchang leh intihsiak huaihawt a nih dan a tar lang a. EMRS Lungleia Principal Pi Lizzy Lalrintluangi'n lawm thu sawiin hawnna hun a khar a. Intihsiakna buatsaih chhunzawm nghal a ni.
He hunah hian Khuallian Pu V. Malsawmtluanga hi a nupui Pi S. Lalngaihzuali'n a ṭawiawm a. Lunglei Municipal Council (LMC)-a Executive Councillor, Ward No. I bialtu Pi Lalhruaitluangi Sailo te, District Level Committee on EMRS member-te, Local Council member leh tlawmngai pawl hruaitute, endiktute, EMRS-a zirtirtute leh zirlaite an tel a ni.
EMRS Cultural & Literary Fest & Kala Utsav hi ram leh hnam inunauna leh inpumkhatna atan te, hnam ziarang humhalhna leh chawi nunna atan te leh zirna piah lama zirlaite mimal thiam thil hai chhuah leh tihpunna atan tea ruahman niin, India ram puma EMRS te chu hnam zai, hnam lam, thu leh hla leh mimal thiam thil chi hrang hrang hmangin an inel ṭhin a. Tun ṭuma Mizoram state level intihsiaknaah hian Mizorama EMRS 11 (Lunglei, Serchhip, Chawngte, Lawngtlai, Ngopa, Tuipang, Bilkhawthlir, Niawhtlang, Tlangnuam, Tlungvel leh Zawlnuam) aṭangin sikul tin ai awh zirlai 20 leh anmahni hruaitu zirtirtu 2 ṭheuh fuan khawmin, ni hnih chhungin inelna chi hrang hrang 24 hmangin an intihsiak dawn a. Inelna hi junior section (class 6 - 8) leh senior section (class 9 - 12) tea kalpui niin, inelna mala pakhatna aṭanga pathumna te hian October chawlhkar thumnaa national level intihsiakna awm turah Mizoram EMRS ai an awh dawn a ni.
Vawiin khan a thawh khatnaah cultural fest hun hman niin, group song (Hindi Patriotic), group dance (Tribal), solo (Hindi Semi-classical) leh painting hmang tea intihsiak a ni a. A thawh hnihnaah Kala Utsav hun hman niin, vocal music, instrumental music, dance, theatre leh music (teacher) huangah te inelna buatsaih a ni a. Naktuk lamah Literary Fest hun hman leh tur niin, elocution, story telling (Tribal Folklore Hindi & English), extempore (Hindi & English), spell bee (English), debate (Hindi & English), creative writing (Hindi & English), recitation leh quiz hmang tea inelna buatsaih a ni ang.
Attachment
- Loading attachment...
